Францускиот претседател Емануел Макрон верува дека САД се отворени за заострување на санкциите кон Русија, а на вонредните парламентарни избори во Канада победи Либералната партија, предводена од премиерот Марк Карни. Снабдувањето со електрична енергија постепено се обновува низ цела Шпанија и Португалија. Фјучерсите на европските акции утрово тргуваат во зелено.
ПОЛИТИКА
Макрон сака заострување на санкциите кон Русија
На геополитички план, францускиот претседател Емануел Макрон верува дека САД се отворени за заострување на санкциите кон Русија, откако минатата недела го повика американскиот претседател Доналд Трамп да заземе поостар став кон рускиот лидер Владимир Путин. Макрон и Трамп во средата разговараа телефонски за американскиот мировен план за Украина, а потоа повторно лично во Ватикан, кога се сретнаа на маргините на погребот на папата Франциск, според зборовите на францускиот претседател.
Либералите на Марк Карни победија на изборите во Канада
Во Канада на вонредните парламентарни избори победи Либералната партија, предводена од премиерот Марк Карни. Кандидатите на Либералната партија досега освоија 135 од вкупно 343 места во парламентот, а Конзервативната партија 88 места. Сè уште не е познато дали либералите ќе успеат да освојат мнозинство за самостојно формирање влада. Потсетуваме, Марк Карни, поранешен гувернер на централните банки на Канада и на Велика Британија, за време на кампањата вети дека ќе го поттикне економскиот раст и ќе му се спротивстави на американскиот претседател Доналд Трамп во трговската војна.
СВЕТ
Струјата постепено се враќа низ Шпанија и Португалија
Струјата доцна синоќа почна да се враќа во делови од Пиринејскиот Полуостров, откако претходно големи делови од Шпанија и од Португалија останаа без напојување со електрична енергија. Тоа доведе до приземјување на авионите, но и до запирање на јавниот превоз и прекинување на рутинските операции во болниците. Шпанското Министерство за внатрешни работи прогласи вонредна состојба на национално ниво, распоредувајќи 30.000 полицајци низ целата земја за да го одржуваат редот. Причината за масовниот прекин на струјата сè уште е непозната, а сомнежите се за проблем со европската електрична мрежа.
БЕРЗИ
Европа
Фјучерсите на европските акции утрово се тргуваат во зелено, бидејќи инвеститорите се подготвуваат за мноштво корпоративни извештаи во Европа и во САД. Неделава во фокусот на инвеститорите ќе бидат и податоците за БДП на Франција и на Германија, но и деловните резултати на водечките европски банки и компании од нафтениот сектор.
САД
И фјучерсите на американските индекси се тргуваат со добивки, во очекување дека американскиот претседател Доналд Трамп дополнително ќе ги ублажи трговските тензии. Истовремено, доларот зајакна за 0,2 отсто, додека цената на златото падна дури еден процент. Забележливо е дека изминатата недела на финансиските пазари се врати извесна смиреност, откако трговската политика на Трамп претходно предизвика нестабилна трговија со акции и обврзници и ги поттикна трговците да продаваат американски активи, вклучувајќи го и доларот.
Азија
Кога станува збор за акциите во азиско-пацифичкиот регион, и тие се тргуваат претежно во зелено, предводени од растот на акциите на компаниите од автомобилскиот сектор. Акциите на „Хјундаи“ (Hyundai Motor) предничат по добивките меѓу јужнокорејските производители на автомобили, откако официјален претставник на Белата куќа изјави дека увозните автомобили ќе бидат ослободени од посебни царини на алуминиумот и челикот. Јапонските пазари се затворени поради државен празник, што доведе до намален обем на тргување во Азија.
.webp){kind=icon}
Во моментов нема коментари за веста. Биди прв да коментира...