„Америка не е на продажба“: Протести пред вечерата на Трамп со инвеститори во неговиот мемкоин

Најголемите сопственици на мемкоинот на Доналд Трамп и други гости беа пречекани од демонстранти при пристигнувањето на свечената вечера со претседателот во неговиот голф-клуб во близинaта на Вашингтон во четвртокот, ден кога биткоинот продолжи да урива рекорди, поттикнат од оптимизмот за поддршката на американската влада за криптоиндустријата.

Кинескиот криптопретприемач Џастин Сан, кој се обидува да реши регулаторен случај во САД, објави фотографија на X (поранешен Твитер) на пат кон вечерата. Трамп го најави своето заминување на настанот преку неговата социјална мрежа (Truth Social), велејќи: „САД ДОМИНИРААТ во криптото, биткоинот и слично и ќе продолжат така!“

Гостите, меѓу кои и поранешниот НБА-играч Ламар Одом, беа пречекани од околу сто демонстранти пред голф-клубот на Трамп. Демонстрантите извикуваа „Срамота!“ и „Се надевам ќе се задавиш од вечерата!“, држејќи транспаренти со пораки како „Америка не е на продажба“ и „Мемкоин-измамници во затвор“.

Во внатрешноста на настанот, секоја маса беше украсена со големи табли со натпис „Фајт, фајт, фајт“ (Fight Fight Fight) - името на компанијата што го лансира мемкоинот $TRUMP. Подароците вклучуваа црни капи и плакети со истиот натпис. 

Настанот беше критикуван од демократите, вклучувајќи ги сенаторите Елизабет Ворен и Адам Шиф, кои предупредија на судир на интереси и можност за „продажба на пристап“ до претседателот, особено на странски државјани.

„Во суштина, тој става табла ‘На продажба’ на тревникот на Белата куќа“, изјави сенаторот Ричард Блументал. Тој учествуваше и на прес-конференција каде што настанот беше наречен „невидена претседателска криптокорупција“.

За да се квалификуваат за вечерата, сопствениците на мемкоин $TRUMP мораа да се регистрираат на онлајн табелата со резултати, која ги следеше нивните просечни средства во текот на три недели. Топ 220 беа поканети, а најдобрите 25 добија и специјален прием со Трамп пред вечерата. Повеќе од половина од нив користеле странски берзи што формално забрануваат корисници од САД, што укажува дека многумина се од странство.

Еден од гостите, Мортен Кристенсен од Мексико, кој управува со „Ердроп алерт“ (AirdropAlert.com), обезбеди место на вечерата за само околу 1.200 долари. Тој изјави дека Трамп во својот говор повторил дека сака САД да станат светска криптопрестолнина.

По заминувањето на Трамп, Џастин Сан беше претставен како говорник. Тој повика индустријата да го поддржи Трамп, бидејќи криптооператорите се соочуваат со регулаторни предизвици веќе една деценија.

Кристенсен додаде: „Малку беше разочарувачки што Трамп одржа само говор и си замина. Се надевавме дека барем ќе прошета низ салата“.

Џоел Ли, извршен директор на ЕВ (EV.com), седеше на иста маса со Сан. Тој изјави дека разговарале за можноста „Трампкоин (Trump coin) да се користи како начин на плаќање на ev.com“.

Во последниве години Трамп од криптоскептик се претвори во најголем поддржувач на индустријата. По лансирањето четири НФТ-колекции, тој ја започна својата втора претседателска функција со поставување регулатори пријателски настроени кон криптото и создавањето стратешка биткоин-резерва.

Семејството Трамп исто така го прошири своето криптопортфолио. Минатата година Трамп и неговите синови ја основаа ВЛФ (World Liberty Financial), која собра над 500 милиони долари. Двајца од неговите синови се вклучија и во рударски бизнис со биткоини. Мемкоинот $TRUMP беше издаден неколку дена пред инаугурацијата.

Пазарната вредност на мемкоинот достигна речиси 15 милијарди долари по неговото лансирање во јануари, но потоа падна на околу 2,9 милијарди. Објавата за вечерата донесе мал пораст на цената. Компаниите ФФФ (Fight Fight Fight LLC) и ЦИЦ (CIC Digital LLC), поврзани со „Трамп организејшн“ (Trump Organization), поседуваат 80 отсто од вкупната понуда на мемкоинот.

Биткоинот се тргуваше по цена од 111.593 долари - нешто под неговиот рекорден максимум - во 8:47 часот во Сингапур во петокот.

Во моментов нема коментари за веста. Биди прв да коментира...

Остави коментар