ПОЛИТИКА
Трговскиот суд ги блокира царините на Трамп
Американскиот трговски суд блокира поголем дел од глобалните царини што ги воведе Доналд Трамп, пресудувајќи дека се незаконски воведени преку закон за вонредна состојба. Одлуката на судот трајно ги блокира царините, освен ако Апелацискиот суд не му дозволи на Трамп повторно да ги воспостави за време на судскиот процес. Министерството за правда веќе поднесе жалба. Пресудата претставува голем удар за економската агенда на Трамп, а глобалните пазари позитивно реагираа со скок на фјучерсите на американските акции и зајакнување на доларот.
САД планираат да ги укинат визите за кинеските студенти
Соединетите Американски Држави ќе почнат „агресивно“ да ги укинуваат визите за кинеските студенти што се поврзани со Комунистичката партија на Кина или студираат клучни области.
Дополнително, САД ќе ја заострат контролата на сите идни барања за визи од Кина и Хонгконг. Ова го изјави американскиот државен секретар Марко Рубио. Оваа одлука доаѓа како дел од напорите на американската администрација да воведе построги критериуми за студирање во Америка, а многумина се загрижени дека тоа може да го продлабочи конфликтот меѓу САД и Кина. Важно е да се напомене дека втората најголема популација на меѓународни студенти во Америка се студенти од Кина, додека на прво место е Индија.
Bloomberg
Трамп нема да воведе нови санкции за Русија
Американскиот претседател Доналд Трамп порача дека нема да воведе нови царини за Русија, бидејќи сака да ја зачува можноста за мировен договор меѓу Украина и Русија. Да потсетиме, украинскиот претседател Володимир Зеленски претходно предложи тој, Путин и Трамп да се сретнат за да разговараат за завршување на војната во Украина.
БЕРЗИ
Европа
Следува преглед на состојбата на глобалните пазари на капитал. Европските фјучерси претежно се тргуваат во зелено откако поголемиот дел од глобалните царини на Доналд Трамп беа прогласени за незаконски и стопирани од страна на американскиот трговски суд. Да потсетиме, европските берзи вчерашното тргување го завршија во црвено.
САД
Од другата страна на океанот, фјучерсите на американските индекси се тргуваат во зелено, поттикнати од блокирањето на царините на Доналд Трамп, но и од добрите резултати на гигантот за вештачка интелигенција „Енвидија“ (Nvidia). Доларот зајакна за 0,2 отсто, достигнувајќи највисоко ниво во последните седум дена. Истовремено, приносите на десетгодишните државни обврзници пораснаа за три базични поени.
„Енвидија“ очекува профит од 45 милијарди долари во вториот квартал
Извршниот директор на „Енвидија“ (Nvidia), Џенсен Хуанг, ја ублажи загриженоста на инвеститорите за забавување на побарувачката во Кина, со предвидување солидна продажба и со уверување дека пазарот на вештачка интелигенција ќе продолжи експоненцијално да расте. ВИ-гигантот очекува профит од 45 милијарди долари во вториот фискален квартал, и покрај забраните за извоз на напредни технологии во Кина.
Компанијата ќе го зголеми производството на својот најнов модел на чип блеквел (Blackwell) и ќе ги понуди своите чипови како дел од цели компјутерски системи за да го забрза применувањето на вештачката интелигенција. Дополнително, Хуанг во интервју за „Блумберг“ истакна загриженост поради американските трговски ограничувања кон Кина, кои го попречуваат долгорочниот раст на компанијата, и апелира до администрацијата на Трамп повторно да дозволи производство на чипови за Кина.
Азија
Кога станува збор за акциите во азиско-пацифичкиот регион, тие претежно се тргуваат во зелено. Прогнозите на „Енвидија“ го поттикнаа растот на азиските технолошки компании. Најголем раст бележат акциите во Јапонија, кои растат за повеќе од 1,5 отсто, додека јапонскиот јен ослабе во однос на доларот.
.webp){kind=icon}
Во моментов нема коментари за веста. Биди прв да коментира...