Претседателот на САД, Доналд Трамп, ги објави своите најнови царински ултиматуми, прогласувајќи стапка од 30 проценти за Мексико и Европската Унија, со што неговата трговска агенда продолжува да ги држи сојузниците во нерамнотежа и да внесува неизвесност во глобалните финансиски пазари.
Трамп го објави ова во две писма објавени денеска на социјалните медиуми, информирајќи ги на тој начин клучните трговски партнери за новите стапки што ќе стапат на сила на 1 август доколку не успеат да преговорат подобри услови.
Тој ја помина неделата испраќајќи писма до земјите, прилагодувајќи ги предложените царински нивоа од април и поканувајќи ги трговските партнери и понатаму да преговараат.
ЕУ се надеваше дека ќе склучи прелиминарен договор со САД за да се спречи царината, но писмото на Трамп го намали оптимизмот за договор во последен момент меѓу големите економии.
Сепак, тој остави можност за дополнителни прилагодувања.
„Ако сакате да го отворите вашиот досега затворен трговски пазар за САД и да ги елиминирате своите царински и нетарифни, политички и трговски бариери, можеби ќе разгледаме прилагодување на ова писмо“, напиша Трамп.
За ЕУ Трамп првично објави царина од 20 проценти на неговиот настан „Ден на ослободувањето“ на почетокот на април, пред да ја намали на 10 отсто како дел од 90-дневната пауза за преговори. Но, тој брзо се разочара од блокот од 27 земји и се закани со стапка од 50 проценти, поттикнувајќи дополнителни разговори.
Претходно неделава ЕУ соопшти дека се приближува кон рамковен договор со САД откако претседателката на Европската комисија, Урсула фон дер Лајен, разговараше во неделата со Трамп.
Царинските стапки ќе се применуваат широко, иако одделно од секторските царини на претседателот за производи како што се автомобили и челик. Доколку се спроведат, тоа би можело да ја стави ЕУ во конкурентски неповолна положба во однос на американскиот извоз во соседната Велика Британија, која во 2020 година го напушти блокот и беше првата земја што склучи трговски договор со Трамп.
Борба против фентанил
Во своето писмо до мексиканската претседателка Клаудија Шајнбаум, Трамп рече дека земјата „ми помага да ја обезбедам границата“, но додаде дека тоа не е доволно.
Трамп посочи дека ако Мексико „успее во предизвиците со картелите и го запре протокот на фентанил“, САД ќе разгледаат прилагодување на даноците.
„Овие тарифи може да се модифицираат нагоре или надолу, во зависност од нашиот однос со вашата земја“, додаде тој.
Во писмото не се споменува дали САД ќе задржат исклучоци за стоките што се тргуваат според трговскиот договор ИСМКА (USMCA), кои се ослободени од сегашната стапка од 25 проценти. Администрацијата претходно изјави дека ќе го задржи ослободувањето за Канада.
Мексико е третата земја што доби писмо, а која всушност не се соочува со зголемување на царините во сега продолжениот рок од 9 јули, по Канада и Бразил.
Други земји што Трамп ги издвои за зголемување на царините во последно време се Јапонија, Јужна Кореја, Јужна Африка, Индонезија, Тајланд и Камбоџа, како и Алжир, Либија, Ирак и Шри Ланка.
.webp){kind=icon}
Во моментов нема коментари за веста. Биди прв да коментира...