Американскиот претседател Доналд Трамп повторно изненади со две најави – шефот на Фед, Џером Пауел, „веројатно“ нема да биде сменет, а повеќе од 150 држави ќе се соочат со царини од 10 до 15 отсто.
Трамп во средата изјави дека е „малку веројатно“ да го смени Пауел, но додаде дека таа можност сè уште постои поради „измама“. Трамп и неговите сојузници последните денови го критикуваа Пауел поради реновирањето на седиштето на Федералните резерви во Вашингтон, тврдејќи дека планираните трошоци се надминати, а зградата е премногу раскошна.
Трамп продолжува да ја тресе глобалната трговија – најави меморандуми за повеќе од 150 земји, со кои ќе бидат известени за воведување царини кои би можеле да изнесуваат „10 или 15 отсто“. Последниве денови тој испрати серија известувања за нови царини кои ќе стапат на сила на 1 август, доколку трговските партнери не успеат да постигнат подобри услови со Америка.
ПОЛИТИКА
Израел ги интензивира операциите во Сирија
Израел вчера го нападна штабoт на сириската армија во Дамаск и пренасочи дополнителни сили кон границата, во обид – според „Блумберг“ – да ги спречи нападите врз сириската заедница на Друзите. Израелските сили од почетокот на оваа недела ги засилија операциите во Сирија, по судирите меѓу Друзите и сириската армија на југот на земјата. Според Сириската опсерваторија за човекови права, најмалку 360 лица се убиени во последниве денови на насилство.
БЕРЗИ
Европа
Со фјучерсите на европските акции утрово се тргува претежно во зелено, во пресрет на објавувањето на финалните податоци за инфлацијата во еврозоната за минатиот месец. Економистите на „Блумберг“ очекуваат дека годишната инфлација во јуни ќе се забрза на два отсто, во однос на 1,9 отсто во мај.
САД
Истовремено, со фјучерсите на американските индекси се тргува во црвено, бидејќи трговците продолжуваат да шпекулираат за неизвесната судбина на првиот човек на Фед – Џером Пауел. Потсетуваме дека американскиот претседател Доналд Трамп порача дека не планира да го смени претседателот на Фед, но не ја исклучи целосно таа можност. Главна причина за неговото незадоволство од Пауел е тоа што Трамп сака пониски каматни стапки.
Извршниот директор на „Банка на Америка“ (Bank of America) и шефот на „Голдман Сакс“ (Goldman Sachs) им се придружија на извршниот директор на „ЏП Морган“ (JP Morgan), Џејми Дајмон, во нагласувањето на важноста за независност на Фед. Брајан Мојнихан во интервју за „Блумберг“ порача дека Фед „е основан да биде независен“.
Азија
Кога станува збор за акциите во азиско-пацифичкиот регион, со нив се тргува претежно со добивки. Истовремено, јапонскиот јен ослабе на 148 јени за долар, а во пад е и австралискиот долар.
.webp){kind=icon}
Во моментов нема коментари за веста. Биди прв да коментира...