Американскиот претседател Доналд Трамп ги критикуваше „Ен-би-си“ (NBC) и „Еј-би-си“ (ABC) како „два од најлошите и најпристрасни медиуми во историјата“, додавајќи дека ќе ја поддржи Федералната комисија за комуникации - ФКК (англ. FCC – Federal Communications Commission) за да им ги одземе лиценците на нивните телевизиски станици.
Медиумите „ми даваат 97 проценти лоши приказни“, напиша вчера Трамп во објава на Трут сошал, „и покрај многу високата популарност и, според многумина, меѓу најдобрите осум месеци во претседателската историја“.
„Ако е таков случајот, тие се едноставно разгранок на Демократската партија и, според многумина, ФКК би требало да им ги одземе лиценците“, додаде тој. „Јас би бил целосно за тоа бидејќи тие се толку пристрасни и невистинити, што претставуваат вистинска закана за нашата демократија!!!“
ФКК им издава лиценци на сопствениците на телевизиските куќи, кои периодично мора да се обновуваат.
Коментарите доаѓаат откако Трамп се вклучи во високопрофилни правни пресметки со големите новински куќи. Тој во јули склучи спогодба за тужбата против „Си-би-ес њуз“ (CBS News) за 16 милиони долари, кратко пред Федералната комисија за комуникации да одобри спојување помеѓу компанијата-мајка на „Си-би-ес“, „Парамонт глобал“ (Paramount Global), и „Скајденс медија“ (Skydance Media). Трамп исто така постигна спогодба од 15 милиони долари со „Еј-би-си“ поради обвинувања за клевета.
Претседателот на ФКК, Брендан Кар, кој инаку е републиканец, отвори истраги за програмите за разновидност, еднаквост и инклузија на „Комкаст“ (Comcast), како и за односите на „Ен-би-си“ (NBC) со нејзините локални радиодифузни подружници.
„Ен-би-си“ е во сопственост на „Ен-би-си јуниверзал“ (NBCUniversal), компанија на „Комкаст“. „Еј-би-си“ е во сопственост на „Волт Дизни компани“ (The Walt Disney Company).
Трамп се нафрли на „Ен-би-си“ и за време на неговиот прв мандат. Во 2017 година тој го отвори прашањето дали ФКК треба да им ги одземе лиценците на телевизиските канали на „Ен-би-си“ откако мрежата објави сторија во која се наведува дека тој повикувал на поголем американски нуклеарен арсенал, нешто што Трамп негираше дека го кажал.
Неодамнешна анкета на „Економист/Југов“ (The Economist/YouGov) покажа дека 56 проценти од испитаниците целосно или делумно не го одобруваат начинот на кој Трамп сега претседава, додека 40 проценти целосно или донекаде го одобруваат.
Анкетата е спроведена во периодот од 15 до 18 август на репрезентативен примерок од 1.568 Американци, а има маргина на грешка од околу 3,5 проценти.
.webp){kind=icon}
Во моментов нема коментари за веста. Биди прв да коментира...