Неколку пожарникари се повредени при гаснењето на пожарот што избувна вчера во фабриката „Макпрогрес“ во Виница позната по брендот„ Винчини“. Пожарот е ставен под контрола, изјави директорот на Дирекцијата за заштита и спасување, Стојанче Ангелов.
„Опожарени се три линии означени како 6, 7 и 8 (од кои два магацини), сите имале сончеви панели на покривот. Спасени се линиите од 1 до 5. Пожарот е под целосна контрола. Во гаснењето учествуваа пожарникари од ТППЕ Виница, Македонска Каменица, Делчево, Кочани, Пробиштип, Штип, Струмица, Кавадарци и Велес“, наведува Ангелов.
Тој наведува дека неколку пожарникари се здобиле со изгореници на стапалата откако се заглавиле во смола од стопен шеќер во еден од погоните.
„При обидот да ги одглават стапалата чизмите им останале во стопениот шеќер и згазнале во стопената смеса“, појаснува Ангелов.
Пожарот во фабриката за кандирани производи и вафли во Виница избувна вчера вечер во 18:40 часот, во магацините и во производствените погони 6, 7 и 8 на фабриката.
Стопанската комора изрази жалење за настанот „кој ќе остави длабока трага врз работењето на една од најуспешните извозни компании во Македонија, во групата на најпознати компании во кондиторската индустрија“, се вели во соопштението.
„Макпрогрес“ од мало семејно претпријатие основано во 1990 година прерасна во современ, индустриски лидер. „Макпрогрес“ е извозник во над 55 земји, главно во Југоисточна Европа. Вработува околу 750 квалификувани професионалци, стои на веб-страницата на компанијата.
.webp){kind=icon}
