Виетнам предупредува на голема кражба на податоци поради хакиран кредитен центар

Виетнам соопшти дека сајбер-нападот врз Националниот центар за кредитни информации можел да доведе до големи повреди и злоупотреби на личните податоци и ја предупреди јавноста да биде во готовност додека се истражува обемот на заканата.

Националниот тим за сајбер-одговор презема итни мерки за справување со инцидентот, соопшти владата на својата интернет-страница. Властите соработуваат со централната банка и со други агенции за да го ограничат нападот и да ги обезбедат системите на кредитниот центар, познат како ЦИЦ (CIC).

Зад нападот веројатно стои хакерската група позната како „Шајни хантерс“ (ShinyHunters), изјавија од ЦИЦ на финансиските институции, вклучувајќи странски и домашни банки, во писмо во кое увид имаше „Блумберг њуз“. Според писмото, групата на онлајн форум изјави дека добила национални кредитни информации и ги понудила на продажба.

ЦИЦ е под надлежност на Државната банка на Виетнам и работи како централно кредитно биро на земјата, собирајќи и обезбедувајќи кредитни информации за поединци и бизниси за поддршка на одлуките за кредитирање низ целиот финансиски систем. Досега не се предизвикани никакви нарушувања или штети, а кредитните услуги остануваат целосно оперативни, соопшти ЦИЦ во писмото. Претставниците оттаму не одговорија веднаш на барањето за коментар.

„Доколку тврдењата на напаѓачите се точни, овој инцидент влијае на речиси целото возрасно население на Виетнам - откривајќи лични карти на владини претставници, даночни евиденции и финансиска историја во еден удар“, рече Пит Реналс од фирмата за сајбер-безбедност „Пало алто нетворкс“ (Palo Alto Networks Inc). Во годините што доаѓаат тоа потенцијално создава невиден ризик од кражба на идентитет и измама, рече Реналс.

Властите ги предупредија поединците и организациите да не преземаат, споделуваат или експлоатираат протечени податоци, велејќи дека и тие како прекршители ќе се соочат со правни мерки. Службениците исто така ги повикаа локалните и странските банки, како и други финансиски институции, да ја зајакнат сајбер-безбедноста во согласност со националните стандарди.

„Шајни хантерс“ е меѓу неколкуте групи за сајбер-криминал со историја на напаѓање големи организации. Во последниве години групата тврди дека крадела податоци од повеќе интернет-страници на компании, вклучувајќи и од „Гугл“ и „Мајкрософт“.

„Настани како овие често служат како аларм за будење, мобилизирајќи ги нациите да ги преиспитаат својата позиција, практики и долгорочни инвестиции во сајбер-безбедноста“, рече Реналс.

Во моментов нема коментари за веста. Биди прв да коментира...

Остави коментар