Aмериканскиот претседател Доналд Трамп предизвика контроверзии откако изјави дека „тиленол“ (Tylenol) – брендирано име за лекот парацетамол, кој е најчесто користен аналгетик и антипиретик и кај нас – може да биде поврзан со развој на аутизам кај децата доколку се користи за време на бременост.
„Земањето ‘тиленол’ не е добро – ќе го кажам – не е добро“, рече Трамп на настан во Белата куќа, повикувајќи ги трудниците да го користат лекот само кога е апсолутно неопходно. Тој најави и поддршка за нова терапија со калциум леуковорин (фолинска киселина), за која администрацијата тврди дека помага кај состојби поврзани со аутизам.
Научната заедница реагираше остро, предупредувајќи дека нема цврсти докази за таква поврзаност и дека нетретираните трески за време на бременост се поголем ризик за плодот.
„Податоците што се наведуваат не го поддржуваат тврдењето дека ‘тиленолот’ предизвикува аутизам, ниту дека ‘леуковорин’ е лек, туку само внесуваат страв и лажно даваат надеж кога нема едноставен одговор“, се наведува во соопштението на Коалицијата на научници за аутизам.
Истражувањата што тврдат дека постои врска не го земаат предвид фактот дека треската сама по себе го зголемува ризикот од аутизам, додава групата.
„Многу е тешко да се одделат ефектите на лекот од ефектите на причината поради која луѓето го земаат лекот“, рече Дејвид Мендел, епидемиолог на Универзитетот во Пенсилванија, кој се занимава со проучување на аутизмот. „Многу сум загрижен дека бремените жени со треска ќе дозволат таа да остане нетретирана.“
Американскиот колеџ за акушери и гинеколози ги оцени постапките на администрацијата како „неодговорни“ и „збунувачки“ за пациентите. Американската академија за педијатрија додаде дека ширењето заблудувачки информации „им нанесува штета на лицата со аутизам“.
Компанијата „Кенву“ (Kenvue), производител на „тиленол“, соопшти дека „независната наука јасно покажува дека парацетамолот не предизвикува аутизам“ и изрази загриженост поради дезинформации што можат да им наштетат на трудниците и на родителите.
.webp){kind=icon}
Во моментов нема коментари за веста. Биди прв да коментира...