Истрага против директорот на Светскиот економски форум, бил гостин кај Епстајн

Светскиот економски форум (World Economic Forum) отвори истрага против својот извршен директор Бoрге Бренде поради неговите контакти со осудениот педофил Џефри Епстајн, откако во новообјавените документи на американското Министерство за правда излегоа докази за нивни средби и комуникација.

Одборот на Форумот соопшти дека одлуката е донесена по откритијата за „три деловни вечери“ на кои присуствувал Бренде заедно со Епстајн, како и по објавените електронски пораки и СМС-комуникации меѓу двајцата. Истрагата ќе биде спроведена како независна ревизија.

„Оваа одлука ја нагласува посветеноста на Форумот кон транспарентноста и зачувувањето на институционалниот интегритет“, се вели во соопштението на институцијата со седиште во Женева. СЕФ додава дека Бренде целосно ја поддржува истрагата и активно соработува, а таа била покрената и по негова иницијатива. Тој ќе остане на функцијата извршен директор, но нема да биде вклучен во процесот на проверка.

Најновата серија документи поврзани со случајот Епстајн покажува дека Бренде договарал средби со него за вечера во неговиот дом во Њујорк, според електронски преписки од 2018 и 2019 година. Во изјава доставена преку Форумот, Бренде наведува дека на првата вечера бил поканет од норвешки дипломат, додека на подоцнежните средби присуствувале и други дипломати и деловни лидери.

„Тие вечери, како и неколкуте електронски пораки и СМС-пораки, се целосниот обем на моите контакти со него“, истакна Бренде. Документите, сепак, откриваат и директна текстуална комуникација, вклучувајќи порака во која Бренде се одјавува со зборовите „Недостигаш господине, Борге“.

Во друга порака, Епстајн пишува: „Лоши вести. Секој пат кога ќе ja видам г-ѓа Пиги, ќе мислам на тебе“, кратко откако испратил слика од личност со долга руса коса. Сликата е делумно затемнета. Бренде одговара: „Ќе живеам со тоа. Подобро е да бидеш запаметен отколку заборавен.“

Бренде тврди дека во тој период не бил свесен за криминалното минато на Епстајн. „Да знаев за неговата позадина и криминалните активности, ќе ја одбиев првата покана, како и сите наредни комуникации“, наведува тој, додавајќи дека жали што не направил подетална проверка.

Истрагата доаѓа помалку од две недели по завршувањето на годишниот состанок на Светскиот економски форум во Давос, каде Бренде имаше истакната улога, вклучително и водење сесија со прашања и одговори со американскиот претседател Доналд Трамп по неговиот контроверзен говор.

Форумот се надеваше дека во 2026 година ќе остави зад себе повеќе од една година турбуленции. Основачот на СЕФ, Клаус Шваб, ненадејно поднесе оставка во април, откако беше покрената истрага за наводно недолично однесување. Иако беше ослободен од обвиненијата, истрагата утврди потреба од сериозни реформи во управувањето со институцијата.

Бренде е претседател и извршен директор на Светскиот економски форум од 2017 година, со оперативна улога. Во меѓувреме, Лари Финк од „Блекрок“ (BlackRock) и Андре Хофман од „Роше“ (Roche) беа именувани за ко-претседатели на Форумот, додека не биде назначено трајно раководно решение.