Како вашата луксузна инвестиција да биде долготрајна

Сфатете го ова помалку како водич за конкретни производи, а повеќе како инспирација за категории работи што ќе ви овозможат максимално да ги искористите тие заштеди или бонус - за самите вас.

Кога мојот долгогодишен пријател Марко ми призна дека, за да се почести по успешно завршен проект, купил два ретро часовници за нешто повеќе од 5.000 евра, не можев да го скријам изненадувањето. Дотогаш секогаш се насочувавме кон луксузни искуства - вечери, патувања и ексклузивни настани - а ова беше првпат да слушнам дека вложил во нешто опипливо. „Такви се времињата“, рече тој.

Часовниците одамна не се само моден детаљ или статусен симбол - тие се меѓу најликвидните луксузни инвестиции. Тргувањето со половни луксузни часовници носи и до 25 пати поголем приход отколку продажбата на нови модели.

Ако и вие размислувате да влезете во светот на половните часовници, сега е вистинскиот момент. По пет години подеми и падови, цените на половните часовници стабилно растат, а натамошниот тренд ќе зависи од два фактора: растот на цените на новите часовници и состојбата на пазарот на акции. Додека првото е многу извесно, второто изгледа непредвидливо.

 

Часовник „ролекс“; Фото: Бинг Гуан/ Bloomberg

Растот на вредноста во моментов го предводат „Патек Филип“ (Patek Philippe), „Ролекс“ (Rolex), „Картие“ (Cartier) од „Си финансиер Ришмон“ (Cie Financiere Richemont SA) и „Омега“ (Omega) од „Своч “ (Swatch Group AG), додека кај други брендови цените сè уште опаѓаат. Сепак, во последниот квартал, 21 од 35 бренда што ги следат „Морган Стенли“ (Morgan Stanley) и „Воч чартс“ (WatchCharts) забележале раст. Сè повеќе купувачи сфаќаат дека, со просечни попусти од 30 до 40 отсто за брендови надвор од водечката тројка, може да се најдат исклучителни понуди.

Ако и вие размислувате како Марко, еве неколку предлози:

• „Патек филип наутилус 5711“ (Patek Philippe Nautilus 5711) - секундарниот пазар расте од 20 до 40 отсто годишно; цената на Балканот се движи од 120.000 до 150.000 евра.
• „Ролекс дејтона 116500ЛН“ (Rolex Daytona 116500LN) - просечна цена на секундарниот пазар од 40.000 до 60.000 евра, со раст од 10-15 отсто годишно.
• „Одемар пиге ројал оук џамбо“ (Audemars Piguet Royal Oak Jumbo) - модели од 2020-2023 година може да вредат 50.000-70.000 евра; просечен раст на вредноста од 15-20 отсто годишно.
• Стратегија: чувајте ги часовниците со оригинални кутии и сертификати и планирајте период на задржување најмалку од три до пет години за оптимален поврат на инвестицијата.

„Ролекс“ (Rolex) од 3.500 евра и „картие“ (Cartier) од 1.700 евра, купени без оригинално пакување и сертификати, што влијаело врз поповолна цена. Добра зделка кај еден белградски часовничар | „Блумберг Адрија“ 

Златници

Доколку тие 5.000 евра сакате да ги вложите во нешто трајно, златото може да биде добра можност. Со цените што во последно време динамично се движеа и создаваа тензии кај инвеститорите, ова и понатаму е една од најсигурните инвестиции, велат аналитичарите. И веднаш да го расчистиме прашањето - прачки или златници? Златните прачки обично се поевтини по грам, бидејќи премијата за изработка и дистрибуција не е висока. Идеални се за поголеми инвестиции и кога купувате злато со намера да го чувате или делумно да го продавате подоцна. Златниците имаат повисок трошок по грам, бидејќи вклучуваат изработка и заштита на брендот, но нудат полесна продажба, поголема ликвидност и често колекционерска вредност.

Ако купувате една унца злато, прачката секогаш е поповолна од десет помали монети од една десеттина унца. Помалите апоени се корисни ако сакате постепено да продавате дел од златото, додека поголемите прачки нудат поедноставна и единствена инвестиција. Кога размислувате за вложување, важно е да ги земете предвид трошоците по грам - помалите апоени имаат повисоки трошоци, додека поголемите унци нудат подобра вредност. Ликвидноста исто така е клучна, па избирајте златници што лесно се продаваат низ светот, како „кругеранд“ (Krügerrand), „мејпл лиф“ (Maple Leaf) или „виенски филхармоничар“ (Vienna Philharmonic). И, секако, купувајте кај доверливи дилери и продавачи.

„Кругеранд“ (Krügerrand) – Јужна Африка

Чистота: 916,7/1.000 (22 карата)
Големини: 1, 1/2, 1/4, 1/10 унца
Карактеристики: прв јужноафрикански инвестициски златник, со препознатлива црвенкаста нијанса поради додаток на бакар; на едната страна има спрингбок, на другата ликот на Пол Кругер.
Популарност: исклучително ликвиден и широко прифатен на глобално ниво.

„Јаворов лист“ (Maple Leaf) – Канада

Чистота: 999,9/1.000 (24 карати)
Големини: 1, 1/2, 1/4, 1/10, 1/20 унца и 1 грам
Карактеристики: на предната страна има лист од јавор, на задната портрет на кралицата Елизабета Втора.
Популарност: еден од најпризнаените инвестициски златници во светот, погоден за долгорочно чување.

„Виенски филхармоничар“ (Vienna Philharmonic) – Австрија

Чистота: 999,9/1.000 (24 карати)
Големини: 1, 1/2, 1/4, 1/10, 1/25 унца
Карактеристики: инструменти од виенскиот филхармониски оркестар; на задната страна е органата во „Музикферајн“ (Musikverein).
Популарност: најпродаван златник во Европа, привлечен и за инвеститорите и за колекционерите.

„Австралиски кенгур“ (Australian Kangaroo / Nugget) – Австралија

Чистота: 999,9/1.000 (24 карати)
Големини: 1, 1/2, 1/4, 1/10, 1/20 унца, 1 грам, како и специјални изданија до 1 тон
Карактеристики: различни мотиви на кенгур во зависност од годината; на спротивната страна има портрет на кралицата Елизабета Втора.
Популарност: ценет поради високата чистота и разновидните изданија.

„Кинеска панда“ (Chinese Panda) – Кина

Чистота: 999,9/1.000 (24 карати)
Големини: 1 унца (од 2016 година околу 30 грама), 1/2, 1/4, 1/10, 1/20 унца
Карактеристики: мотивот на пандата се менува секоја година, што ја зголемува колекционерската вредност.
Популарност: многу барана и меѓу инвеститорите и меѓу колекционерите.

„Американско бафало“ (American Buffalo) – САД

Чистота: 999,9/1.000 (24 карати)
Големини: 1, 1/2, 1/4, 1/10 унца
Карактеристики: првиот американски 24-каратен инвестициски златник; на едната страна има глава на домороден Американец, на другата американски бизон.

Накитот како инвестиција?

Инвестициите во накит пораснале за 8 отсто по вредност во текот на изминатата година и бележат континуиран раст. Зглоб покриен со внимателно одбрани парчиња, освен што е симбол на статус, може да биде и паметна инвестиција.

Еве четири предлози како вашата инвестиција секогаш да ја имате при себе - поточно, на рака.

Долгогодишната актуелност што одредени модели ја задржуваат ги издвојува како особено профитабилни можности во овој сегмент. Ограничените серии дополнително ја зголемуваат вредноста на секундарниот пазар. Станува збор за парчиња со изразена индивидуалност, силен наратив и длабока поврзаност со брендот, интегрирана во самиот дизајн, поради што автоматски претставуваат симбол на статус и стил и за сопственикот и за „публиката“.

„Картие лав брејслет“ (Cartier Love Bracelet)

Белезицата што со децении се користи како симбол на љубовна посветеност е претставена во 1969 година од куќата „Картие“ (Cartier). Симболиката на љубовта се нагласува и преку самиот механизам - не може едноставно да се стави или извади. За да ја носите, потребно е да ја затегнете со специјален шрафцигер, односно „клуч“ што доаѓа со неа.

Моделот го дизајнирал Алдо Чипуло во Њујорк. Достапна е во жолто, розово и бело злато во класична верзија, со цена од околу 7.050 фунти. За полуксузни варијанти, со дијаманти и други скапоцени камења, цената се движи од 11.000 до 59.500 фунти.

Доколку сакате да ја продадете својата белезица „картие“ , важно е да ги имате оригиналното пакување, шрафцигерот, сметката и сертификатот - тие се најдобра гаранција за постигнување највисока цена. Според платформата за препродажба на користен накит и луксузни производи „Рибег“ (Rebag), се задржува околу 79 отсто од првичната куповна вредност.

„Ван клиф енд арпелс алхамбра“ (Van Cleef & Arpels Alhambra)

Белезицата со мотив на детелина од „Ван Клиф енд Арпелс“ (Van Cleef & Arpels) денес за многумина е новата „картие лав“.

Сè повеќе купувачи откриваат модели како „Алхамбра“, слично како што пред десет години бараа чанти од „Луј Витон“ (Louis Vuitton). Наглиот пораст на популарноста се толкува како сигнал дека сегментот на врвен луксуз, особено часовници и накит, е поотпорен на кризи отколку во минатото.

Кога „Ришмон“ (Richemont) ја презеде оваа куќа за луксузен накит за 310 милиони евра, во три фази од 1999 до 2003 година, постоеше само една линија „Алхамбра“. Денес има шест колекции под тоа име, меѓу кои „Лаки“, со мотиви на срце и пеперутка, и „Бизантин“ (Byzantine), со масивни златни детали. Покрај „Алхамбра“, воведени се и други линии како „Перле“ (Perlee), со ситни златни перли, и „Фривол“, со листови во форма на срце. Почетната цена е околу 5.000 долари.

Новиот ѓердан „меџик алхамбра“ може да се претвори во алка | „Ван Клиф енд Арпелс“

 

„Тифани Т“ (Tiffany T)

Со просечно задржување на вредноста од 50 отсто, одредени модели од овој бренд се покажаа особено успешни. Меѓу нив е ѓерданот „ритерн ту тифани харт таг чокер“ (Return To Tiffany Heart Tag Choker), со просечно задржување на вредноста од 94 отсто, првично претставен на почетокот на 2000-тите, а нов бран на популарност доби со колекцијата „Ритерн ту Тифани x Бијонсе“ (Return to Tiffany x Beyoncé).

Една од алките што остануваат безвременска е моделот „Т сквер“ (T square), со едноставни и модерни линии од колекцијата „Тифани Т“. Почетната цена за основниот модел од жолто злато изнесува околу 2.800 евра.

„Ермес колие де шјен“ (Hermès Collier de Chien)

Во 1837 година, во својата работилница на адресата 56 Ру Басе ду Ремпа (56 rue Basse-du-Rempart), Тиери Ермес изработил колекција извонредни узди, ремек-дело наменето за коњи. Подоцна, во 1927 година, брендот ја црпел инспирацијата од коњичкиот свет за својот прв накит - алката „филе де сел“ (Filet de Selle).

Една од најисплатливите инвестиции, сепак, се појавува во 1949 година – колекцијата „Колие де Шјен“, која станува препознатлив симбол на куќата „Ермес“. Брендот создавал ограничени изданија од оваа алка, вклучувајќи и верзии од егзотични кожи, во живописни бои или со метални елементи украсени со дијаманти. Повремено биле изработувани и верзии од чисто злато.

Алката „ермес колие де шјен“ задржува околу 66 отсто од својата вредност на пазарот на препродажба, што ја прави разумна инвестиција. Цената за нов модел започнува од околу 1.500 евра, во зависност од материјалите и деталите. Добрата вест е што за оваа белезица не се чека со години, како што е случајот со чантата „биркин“ (Birkin) од истиот бренд.

Инвестирањето во себе секогаш е добра идеја

Во време на неизвесност, никогаш не било поважно да се ставите себеси на прво место и да преземете контрола врз сопствениот живот. Еве неколку идеи за различни буџети.

Надградете се преку програма за личен развој. Без разлика дали сакате да ги подобрите деловните вештини, физичката подготвеност, емотивниот живот или да се справите со одредена животна фаза, професионален тренер може да ви помогне во остварување на целите.

Подостапна опција е водење дневник, односно журнал. Тоа не е само начин да ја зачувате сопствената приказна туку и алатка за планирање, креативна работа и подготовка за важни преговори. Истражувањата покажуваат дека менаџерите што  ги запишуваат своите идеи постигнуваат и до 25 отсто подобри резултати. За да му дадете луксузна нота на овој ритуал, можете да инвестирате во квалитетен дневник.

Дневници „смитсон“. Цена од 200 евра

 

 

Подобрете ја физичката форма со системот за тренинг „Каталист џен 4“ (Katalyst Gen 4) - високотехнолошки костум што користи мускулна електростимулација, овозможувајќи целосен тренинг на телото за само 20 минути. Цена: од 2.500 евра.

Дали е време за естетска интервенција што одамна ја посакувате? Популарноста на процедури како филери, ботокс и импланти не опаѓа. Освен Истанбул, кој одамна е светски центар за трансплантација на коса, сè повеќе клиники успешно ги изведуваат овие зафати и кај нас. Цената започнува од околу три евра по графт.

За зголемување или намалување на градите се издвојуваат меѓу 4.500 и 7.000 евра, додека корекција со подигнување чини дополнителни 1.000 евра. Најновите техники за зголемување на градите, како „МИА Фемтек“ (MIA Femtech) и „Призрв“ (Preservé), достигнуваат и до 8.300 евра.

За хируршки лифтинг на лице и врат се потребни околу 10.000 евра, а за таканаречената „дип-плејн“ техника дополнителни 3.000 евра, која според многу експерти стои зад видливото подмладување на Крис Џенер. За целосно и долготрајно подмладување на лицето може да бидат потребни и до 20.000 евра, преку програми што комбинираат повеќе зафати, вклучувајќи проширен дип-плејн лифтинг, привремено подигнување на веѓите, корекција на горните и долните очни капаци и дополнителни процедури како подигнување на усните.

Здравјето е богатство

На крајот, најголемиот луксуз не е она што го купуваме, туку колку долго и како можеме да уживаме во сè што сме изградиле. Токму затоа долговечноста станува тема број еден. Сè повеќе луѓе вложуваат во различни протоколи за зачувување на здравјето и виталноста, а интересот расте и во регионот Адрија.

Пример е клиниката „Ревита биолошка долговечност“ (Revita Biological Longevity) во Рогашка Слатина, Словенија, која покрај сместување во хотел со пет ѕвезди, нуди и осум различни програми: антиејџинг, детоксикација, програми за спортисти, кардиобаланс и општо подобрување на здравјето. Особено е интересно што меѓу корисниците има многу спортисти, но и менаџери и деловни лидери од регионот.

Тридневна програма за детоксикација на клеточно ниво чини 1.968 евра, додека продолжена програма од 21 ден изнесува 18.000 евра. Цената на антиејџинг-програмата е слична - нешто помалку од 2.000 евра за три дена и 18.900 евра за три недели. Приближни се и трошоците за програмите за општо подобрување на здравјето.

Bloomberg

Доколку сакате конкретно да ги следите резултатите од вложувањето во поквалитетен и подолг живот, денес постојат голем број технолошки помагала. Прстенот „оура 4“ (Oura Ring 4) чини околу 400 евра и ги мери клучните параметри како сон, ниво на стрес и фитнес-индикатори. Алката „вуп“ (Whoop), која се поврзува со апликација за детална анализа на податоците, чини од 50 евра, со претплата од 125 евра. „Епл воч“ (Apple Watch), во зависност од моделот, најчесто се движи меѓу 300 и 800 евра, а дополнителната претплата за услуги како „Епл фитнес плус“ (Apple Fitness+) може дополнително да го унапреди следењето на здравјето и тренингот.