Гувернерот што жали за куната, а сепак го воведува еврото
Долгогодишниот гувернер на Хрватската народна банка (ХНБ), Борис Вујчиќ, во јануари станува 26-от член на Советот на ЕЦБ бидејќи Хрватска го воведува еврото, а тој одигра една од поважните улоги во процесот на пристапување во еврозоната, од почетокот до крајот.
„Личноста што најмногу жали за куната сум јас, затоа што никој друг не потпишува банкноти од куни. Секако, како економист знам дека за Хрватска е подобро да го воведе еврото и затоа од самиот почеток се залагав за тоа“, изјави Вујчиќ во интервју за „Блумберг“ пред неколку месеци .
Тој беше вицегувернер на ХНБ во два мандата, каде што ја помина практично целата своја кариера. Тој стана гувернер на ХНБ во 2012 година, а во 2018 година Саборот по вторпат му довери шестгодишен гувернерски мандат.
Тој беше и заменик на главниот преговарач во преговорите на Хрватска со ЕУ, а од октомври 2016 година е претседател на управниот одбор на Втората виенска иницијатива (Vienna 2.0 Initiative).
Негови области на специјализација се монетарната анализа, економијата на трудот и меѓународните финансии.
Публикацијата „Глобал маркетс“ (GlobalMarkets) го прогласи гувернерот Вујчиќ за најдобар гувернер во Централна и Источна Европа во 2018 година, а магазинот „Банкер“ (The Banker) таа година му го додели признанието за најдобар европски гувернер и најдобар гувернер во светот. Во 2021 година, Извршниот одбор на Унгарската централна банка (МНБ) му ја додели наградата „Ламфалуси“ (Lámfalussy), престижно меѓународно признание за целосна кариера, со посебен акцент на заслугите за успешниот процес на интеграција на Хрватска во ЕУ.
На оваа листа можеa да се најдат и други гувернери на централните банки во регионот, бидејќи сите до еден мораа да се справуваат со тврдоглавата инфлација. Но, едни беа повеќе, а други помалку успешни.
.webp){kind=icon}
