.webp){kind=icon}
Македонскиот борец Горјан Славески во август годинава стана светски шампион во велтер категорија (до 75 килограми) во шампионатот за борби без ракавици БКФЦ (Bare Knuckle Fighting Championship - BKFC), која веројатно е една од најсуровите боречки вештини.
Во главната борба во турнирот во Мајами шампионскиот појас го освои со едногласна одлука на судиите откако очигледно доби три од петте рунди со ривалот Џејк Линдзи.
Славески, кој секогаш во рингот влегува во ритамот на песните од скопскиот рапер Страјк, ја покажа својата желба за победа, издржливост и талент во борбата со искусниот противник.
„Да бидам искрен, не го паметам мечот затоа што уште од првата рунда добив потрес од удари во задниот дел на главата и во самата завршница му пријдов на менаџерот за да го прашам што славиме“, изјави Славески за медиумите.
Тој во ова натпреварување има перфектен резултат со шест победи од исто толку борби. Патот на Славески до светската титула почна во април 2022 година, по што во рок од една година дојде до тронот во својата категорија.
