.webp){kind=icon}
Јубилејната година за „МК груп“ на Миодраг Костиќ беше можност компанијата да најави инвестиции од 1,6 милијарда евра во наредните три години, од кои речиси милијарда во обновливи извори на енергија. Во 2023 година компанијата го заврши својот четврти парк на ветерници во првата соработка со словенечкиот фонд „Алфи грин енерџи“ (Alfi Green Energy), во тек е изградбата на уште две ветерни електроцентрали, а компанијата го развива и првиот агросоларен проект на Балканот, исто така во Србија. Дека инвестициите на Костиќ не заостануваат ни во регионот, доказ е и отворањето на луксузниот комплекс во хрватска Савудрија кон средината на минатата година, кој со повеќе од сто милиони евра е една од најголемите инвестиции во хрватскиот туризам.
Консолидацијата во банкарскиот сектор продолжува и годинава, па по преземањето на „Сбербанк“ во 2022 година, „АИК банка“ на Костиќ минатата година ја презеде многу поголемата „Еуробанк директна“, со што се вклучи во борбата за самиот банкарски врв. Купопродажната цена од 280 милиони евра е една од најголемите трансакции во 2023 година во Србија. Покрај тоа, Костиќ стана најголемиот акционер на „Адико банка АГ“, австриска банка со филијали во Србија, Словенија, Хрватска, Босна и Херцеговина и во Црна Гора.
Најзначаен потег на Миодраг Костиќ во 2023 година е одлуката да му ја донира на општеството Палатата на науката, која е вредна 25 милиони евра. Станува збор за донација што му е предадена на Електротехничкиот факултет во Белград. Иако финансиски неспоредлив со инвестициите во развојот на бизнисот вредни стотици милиони евра, овој потег може да ги поттикне другите деловни луѓе да инвестираат повеќе во заедницата во која живеат.
