.webp){kind=icon}
Дваесетте години занимавање со професионален тенис Новак Ѓоковиќ ги круниса со неверојатни резултати минатата година. По турбулентната 2022 година, која ја заврши како петти играч во светот, минатата година ја заврши убедливо на првото место на АТП-листата и слободно може да се каже дека му нема рамен. Четири гранслем-финалиња, победник во три од нив. Единственото нешто што не го освои беше Вимблдон, каде што беше поразен од веројатно моментално неговиот најголем ривал Карлос Алкараз. Но затоа трофеите од Австралија опен, Ролан Гарос и САД опен му беа доволни да ја заврши годината со 24 гранслем-турнири, со што го израмни рекордот на Маргарет Корт по вкупниот број на најпрестижни титули освоени во историјата на тенисот. Сепак, рекордите за Новак Ѓоковиќ не завршуваат тука. Минатата година тој стана единствениот играч што ги освоил сите четири гранслем-турнири најмалку трипати, ја забележа својата 40-та мастерс-титула и го освои турнирот на сезоната.
Иако полека ја крчка својата 37. година, Ѓоковиќ сè уште не покажува знаци на замор. Ниту физички, ниту психички. Напротив, многубројните натпревари што ги одигра во 2023 година покажаа сè уште неверојатна ментална бистрина и регенерација, што, заедно со неговата очигледно натпросечна физичка подготвеност, го става барем копје пред другите натпреварувачи, од кои некои се десет или дури 15 години помлади. Доволно за уште една одлична сезона во која се стреми кон нов рекорд - освојување на стотата титула. За тоа му требаат само уште три. И онака веќе стигна до ѕвездите.
