.webp){kind=icon}
Со освојувањето на титулата во најсилната кошаркарска лига на светот во сезоната 2022/2023, Никола Јокиќ стана петтиот Србин што освоил шампионски прстен во НБА, по Дарко Миличиќ, Предраг Стојаковиќ, Огњен Кузмиќ и Немања Бјелица. Во осмата сезона што ја одигра за Денвер нагетс, Јокиќ беше важен запченик во шампионскиот поход на НБА-тимот, со просек од 24,5 поени, 11,8 скока и 9,8 асистенции за 33,7 минути на теренот. Дека ја задржа формата во новата сезона покажува и статистиката, која е дури и малку подобра во полусезоната и ги поткрепува очекувањата дека слично сценарио би можело да се повтори и во сезоната 2023/2024.
Одличните резултати од клупското натпреварување, за жал, Јокиќ не ги пренесе и на репрезентативниот терен. Кошаркарската нација минатото лето тешко ја прими веста дека Јокиќ нема да биде дел од српската репрезентација на Светското првенство. Кога од него се очекуваше најмногу, Јокиќ на суров професионален начин го избра најдоброто за себе. На крајот тоа се покажа најдобро и за репрезентацијата, која во негово отсуство стана вицешампион на светот, што е неспоредливо подобар пласман од годината претходно, кога со Јокиќ во своите редови беше елиминирана во првата нокаут-фаза на Европското првенство.
