.webp){kind=icon}
Во својата шеесетта година од животот, по четири децении глума и 20 години продукција и режија, Драган Бјелогрлиќ го сними, како што вели, најтешкиот филм досега. „Чувари на формулата“ е остварување работено на основа на вистински настани во нуклеарниот институт „Винча“, каде што во 1958 година се случила несреќа во која група научници биле озрачени. Филмот освои голем број европски и регионални награди на фестивали, но не ги исполни очекувањата да биде српски кандидат за „оскар“, што беше непријатно изненадување и за самиот Бјелогрлиќ. За еден филм што нема комерцијални аспирации, 300.000 гледачи до Нова година е повеќе од значајна публика. Направен како фестивалски и европски филм, својата потврда секако ја доби со освојувањето на двете награди на фестивалот во Локарно - за најдобар филм во селекцијата на Пјаца Гранде, како и „златен леопард“, кој им се доделува на филмови со највпечатлива порака. „Чувари на формулата“ беше првиот филм од Србија прикажан на еден од најстарите и најпрестижни филмски фестивали, кој се одржува од 1946 година.
Во 2023 година Драган Бјелогрлиќ беше активен и препознаен во пошироките општествени кругови како еден од иницијаторите и потписниците на „ПроГлас“, иницијатива на јавни личности со порака до граѓаните да го остварат своето право на глас и да гласаат на вонредните декемвриски избори. Иницијативата беше мошне забележана, познавачите на состојбите сметаат дека беше своевиден ветер во грбот на опозицијата, додека претставниците на власта се обидуваа да ја дискредитираат.
