.webp){kind=icon}
Повеќе од 1.000 доктори на науки што ќе работат во 300 лаборатории, седум факултети, научно-технолошки парк и девет институти треба да се најдат под еден покрив, во рамките на „БИО4 кампус“, кој Србија го гради во Белград. Кампусот, кој ќе биде центар на биомедицината, биотехнологијата, биоинформатиката и биодиверзитетот, ќе се простира на околу 30 хектари. Проценетата вредност е околу 450 милиони евра, како заем од Банката за развој на Советот на Европа се обезбедени 200 милиони евра, а се очекува проектот да биде завршен до 2026 година.
Идни станари на „БИО4 кампус“ се Биолошкиот, Фармацевтскиот, Хемискиот, Медицинскиот, Земјоделскиот, Техничко-металуршкиот и Факултетот за спорт и физичко образование, Научно-технолошкиот парк Белград, како и девет институти - за молекуларна генетика и генетски инженеринг, мултидисциплинарни истражувања, примена на нуклеарна енергија, медицински истражувања, за биолошки истражувања „Синиша Станковиќ“, за вештачка интелигенција, хемија, технологија, „Биосенс“ и институтот за кардиоваскуларни болести „Дедиње“.
Изградбата е поделена во неколку фази, а во првата фаза ќе се градат 110.000 квадратни метри корисна површина. Кампусот ќе биде можност за домашните истражувачи, но и за враќање на експертите од дијаспората. „БИО4 кампусот“ треба да му овозможи на Белград да стане значаен биоекономски центар во Европа.
Глобални партнери на кампусот се компаниите „Рош“ (Roche), „Такеда“ (Takeda), „Мерк Шарп енд Доме“ (Merck Sharp and Dohme), „Фајзер“ (Pfizer), „Свис рокетс“ (Swiss Rockets), како и кинеската „БГИ груп“ (BGI Group).
