.webp){kind=icon}
Го гледам мојот личен тренер пет дена во неделата и сега сум во најдобрата форма во мојот живот. Не можев да си дозволам да му плаќам на Даг додека бев млада, а немаше да можам ни сега ако не беше технологијата. Даг живее на западниот брег и ме тренира мене (и десетици други) преку апликација. Тој ги приспособува вежбите на моите потреби, земајќи ги предвид моите повреди, но и следи колку вежбам, го коригира моето држење и испраќа мотивациски пораки. Благодарение на вештачката интелигенција (ВИ), тој сега може да креира персонализирана обука за поголем број клиенти отколку што можеше порано.
Претпоставувам дека вештачката интелигенција може целосно да го замени, но важно е дека Даг е вистинска личност. Знам дека гледа што се случува и дека е посветен. Се чувствувам како да го изневерувам ако не се појавувам на тренингот секој ден. Не би ми било гајле многу ако е бот.
Моето искуство со Даг е пример за тоа како технологијата може да се искористи за да се направи персонализирана квалитетна услуга достапна за секого. Ова не е иднината само на фитнесот туку и на финансиското планирање.
Всушност, целиот услужен сектор е на работ на трансформација. Како што индустриската револуција го промени начинот на кој се произведуваат и трошат стоките така и технолошката револуција ќе го промени услужниот сектор. Кога нешто може да се произведе во поголем обем, пазарот се проширува и се дели на сегменти; некои луѓе сакаат (и можат да си дозволат) чанта „биркин“ (Birkin), додека други претпочитаат платнени чанти. Истото тоа важи и за финансиското планирање.
Финансиското планирање веќе минува низ транзиција. Прво, поради преминувањето кон пензиските шеми со дефинирани придонеси и зголемувањето на животниот век, на сè повеќе луѓе им треба совет. Планирањето за пензионирање не е лесно. Не знаете колку долго ќе живеете вие или вашиот сопружник или со какви здравствени проблеми ќе се соочите, но сепак треба да одлучите колку ќе заштедите, ќе потрошите или ќе инвестирате. Одвреме-навреме ќе ви треба лице што ќе ве одврати од евентуална продажба кога вредноста на финансискиот пазар опаѓа.
Преовладува теоријата дека колку повеќе пари има некој толку повеќе финансиски совети му се потребни. Сепак, на сите им треба помош. И колку помалку пари имате толку помалку има простор за грешка. Добриот совет помалку се однесува на тоа како да се надмине пазарниот тренд, т.е. да постигнете подобри резултати од пазарниот просек, а повеќе на планирање и управување со ризик.
Финансиските советници, барем оние што наплаќаат за своите услуги исклучиво преку фиксни такси или по час, традиционално ги земаат за клиенти побогатите, обично луѓе со најмалку милион долари. Но робосоветите, кои постојат повеќе од една деценија, ја сменија економијата на оваа област. Автоматската дистрибуција на пари стана достапна за повеќе луѓе, без оглед на средствата со кои располагаат.
Првично тоа беше прифатено од милениумци што веќе знаеја како да ја користат технологијата и немаа комплицирани барања. Сега вештачката интелигенција може да обезбеди уште подобри совети, повеќе приспособени на индивидуалните потреби и способни да зборуваат како човечки советник. Може дури и да се обучи да препознава модели на однесување што ги спречуваат луѓето да донесуваат оптимални финансиски одлуки.
Имајќи го сето ова на ум, иднината веројатно лежи во хибриден модел - финансиски планер, кој е еквивалент на мојот тренер Даг. Во таа хипотетичка иднина, мојот финансиски советник, да го наречеме Ворен, користи вештачка интелигенција за да создаде портфолио што одговара на моите потреби, како и за основна комуникација. Тоа ќе му овозможи на Ворен да посвети повеќе време на својата основна улога: управување со нашиот однос.
Добар советник е во еден дел финансиски планер, во друг е терапевт. Ќе ве принуди да водите тешки разговори за прашања како што е можноста за финансирање на музичката кариера на вашиот 40-годишен син и трошоците за нега при крајот на животот, па и погребот. Претпоставувам дека ботови со вештачка интелигенција можат да станат повешти за вакви дискусии, но дали навистина би сакале да се консултирате со бот по смртта на вашиот сопружник и откако ќе ги преземете семејните финансии за првпат? Или кога вашето дете има болест чие лекување е скапо? Луѓето често се потпираат на финансиски советници во тешки времиња и се подготвени да платат повеќе за човечки контакт.
Пазарот за финансиски совети со користење вештачка интелигенција моментално е мал, но неизбежно е дека тој ќе расте и ќе дојде до сегментација. Вашиот советник може да користи технологија за да управува со вашите средства, но сепак ќе ви посветува многу време и внимание. Ако имате повеќе од 100.000 долари, а помалку од еден милион, веројатно ќе работите со вистински советник што користи вештачка интелигенција, кој ќе внимава на вашето портфолио, но сепак ќе води тешки разговори со вас. Ако имате помалку од 100.000 долари, веројатно целосно ќе се потпрете на технологијата за управување со вашите пари, која, барем кога станува збор за градење портфолио, наскоро би можела да ги обезбеди истите квалитетни услуги како врвниот советник.
Како што реков, Даг ми помогна да влезам во најдобрата форма во мојот живот. Не е лудо да се мисли дека истиот модел со поддршка на вештачката интелигенција може да им помогне на многу луѓе да ја подобрат својата финансиска состојба.
