text size
Благодарение на брачната двојка Лејла и Денис Краљевиќ, основачи на „Дерубис јахт“ (Derubis Yachts) и „Дерубис караванс“ (Derubis Caravans) од босански Витез, во почетокот на 2022 година Босна и Херцеговина го доби својот прв сериски производител на камп-приколки, а неколку месеци подоцна и единствениот босански сопственик на сертификат за хомологација и за производство на готови возила во Европската Унија. Станува збор за луксузни камп-приколки, кои веќе ги најдоа своите купувачи низ цела Европа. Значајно е да се истакне дека „Дерубис караванс“ е единствениот домашен производител на ваков вид производи на територијата на целиот Балкан, но и пошироко.
Пред четири години ја претставија првата луксузна јахта произведена во БиХ, кога ја основаа компанијата „Дерубис јахтс“. Така, Босна и Херцеговина стана една од земјите што може да се пофалат со бродоградба. Првата произведена јахта, претставена на саемот во Хамбург, беше прва во својата класа со хибриден погон. Овие јахти се посебни по тоа што се произведуваат на 220 километри од најблиското морско пристаниште, со што ги урнаа сите стереотипи и докажаа дека изградбата на луксузни пловни објекти не е резервирана само за големите производители. Нивниот годишен производствен капацитет е 16 пловни објекти, а рокот на испорака е шест месеци. Пазар за овие јахти е целиот свет, а неодамна една отиде во Костарика. Моментално вработуваат 20 луѓе, а соработуваат и со толкав број кооперанти од околните градови, па, така, околу еден производ се создаде вистински мал кластер. Со својата продажна мрежа, „Дерубис јахтс“ моментално е присутен речиси во сите земји во светот.
.webp){kind=icon}
