.webp){kind=icon}
Гордана Вуњак-Новаковиќ е редовна професорка по биоинженерство и медицински науки на универзитетот „Колумбија“ во Њујорк. Таа е најцитираната српска научничка во историјата, според податоците на мултидисциплинарните индекси од литературата во списанијата за наука, општествени науки, уметност и хуманистички науки „ИСИ веб оф сајенс“ (ISI Web of Science) и „ИСИ гугл оф сколар“ (ISI Google Scholar), а во исто време е и една од најцитираните научници на сите времиња од кој било сектор воопшто.
Во 2022 година, нејзиниот тим направи голем пробив, бидејќи со еден чип успеа да поврзе повеќе вештачки органи, со што им олесни на лабораториските истражувачи прецизно да ја симулираат работата на поврзаните органи, односно да создадат модели за истражување системски болести како ракот.
Вуњак-Новаковиќ се смета за еден од најистакнатите светски експерти во инженерството на човечките ткива, а нејзиниот тим се занимава со насочување на диференцијацијата и склопувањето на човечките клетки во функционални ткива, користејќи „клеточно-инструктивен“ пристап базиран на ткивно специфични носители (што обезбедува шаблони за формирање ткиво) и напредни биореактори (што обезбедува контрола на средината, молекуларна и физичка сигнализација).
Покрај научната работа, Вуњак-Новаковиќ е вешта и во претприемаштво и се залага за практична применливост на сè што излегува од нејзината лабораторија. Таа е и коосновачка и членка на управниот одбор на четири компании: „ЕпиБоун“ (epiBone) за биомедицински инженеринг, „Тара биосистемс“ (Tara Biosystems) за иновации во биологијата на матични клетки, „Ксиликс био“ (Xylyx Bio) за технолошка платформа за ткивни супстрати и „Имплекејт“ (Immplacate) за клеточна терапија.
Вуњак-Новаковиќ е членка на Европската академија (Academia Europæa), Српската академија на науките и уметностите (САНУ), Американските академии за инженерство (NAE), медицина (НАМ) и пронаоѓачи (NAI), како и на Американската академија за уметности и науки (AAAS).
