.webp){kind=icon}
Инженерот за мостови Марјан Пипенбахер се најде на листата на највлијателни луѓе во 2022 година поради неговиот проект за мостот што ја поврзува Далмација со полуостровот Пељешац, кој се смета за еден од најважните проекти на сите времиња во Хрватска. Пељешкиот мост е отворен во јули 2022 година, долг е 2,4 километри и висок 55 метри. Се градеше две и пол години. Вредноста на проектот беше 420 милиони евра, а 85 отсто од инвестицијата беше кофинансирано од ЕУ.
Со мостот, по повеќе од 300 години, беше премостен Малостонскиот Залив, со што југот на Хрватска првпат во историјата се поврза физички со остатокот од земјата. Пипенбахер започна да го подготвува проектот уште во 2012 година. Хрватскиот премиер Андреј Пленковиќ за време на отворањето изјави дека мостот го граделе „осум влади, леви и десни, и сите имале заедничка цел“. Во хрватските медиуми се појави напис дека мостот го платиле Европејците, го изградиле Кинезите, го дизајнирале Словенците, а Хрватите ќе му се восхитуваат и ќе се возат по него.
Пипенбахер во текот на својата кариера проектира повеќе од 200 моста. Меѓу нив треба да се истакне вијадуктот на автопатот Чрни Кал, а меѓу другите и мостовите во Турција, Алжир и Израел.
