.webp){kind=icon}
Менаџерот што ја води најголемата балканска банка
Првиот човек на Нова љубљанска банка (НЛБ), Блаж Бродњак, отворено најавува формирање на т.н. балканска банка, откако минатата година успеа да ја преземе словенечката подружница на руската Сбербанк и во НЛБ да ја интегрира српската Комерцијална банка, која, освен во Словенија, работи и на пет пазари во Југоисточна Европа. „Ние би биле единствената финансиска институција во областа на целата поранешна заедничка држава“, изјави тој за „Блумберг Адрија“. Бродњак не ја исклучува можноста НЛБ да направи уште едно купување на среден рок: тој покажува особени апетити за проширување во Хрватска и во Албанија.
Минатата година НЛБ успешно се задолжи на пазарот на обврзници. Тие ги издадоа трипати - кон средината на летото за 300 милиони евра (со каматна стапка од шест отсто), потоа во септември за 82 милиони евра (со каматна стапка од 9,71 отсто) и во ноември за 225 милиони евра (по каматна стапка од 10,75 отсто). Високите камати го изненадија дури и Бродњак, кој не ги очекуваше. Според него, причина за нешто повисоката камата е пред сѐ тоа што не е само банка од еврозоната туку и банка од Балканот. „Ако имате голема изложеност на земји што не се дел од еврозоната, последователно имате повисоки каматни стапки, како што се повисоки и на државните обврзници на Србија, Македонија, Босна и Херцеговина“, објасни Бродњак за „Блумберг Адрија“.
Здружението на менаџери минатата година на Бродњак му ја додели титулата менаџер на годината за 2022-та.
Како и другите банки во регионот и во Европа, НЛБ прекуноќ ја презеде руската филијала на Сбербанк во Словенија, која беше на работ на банкрот. Колку Бродњак верува во успехот на приказната за НЛБ говори фактот што тој самиот инвестира во акциите на компанијата што ја води. Моментално поседува 1.800 акции, во вредност од 111.000 евра (според курсот од 62,2 евра во моментот на пишувањето). „Одвреме-навреме купувам стотина акции. Дури за оваа намена подигнав долгорочен кредит бидејќи немав доволно заштеди“, призна тој неодамна. Како што откри, последниве години интензивно инвестира во земјоделски површини во Халозе, каде што купува пасишта, ниви и лозја, пред сѐ за самоодржливост на храната. „Не се занимавам сам со тоа, повеќе сум во улога на спонзор на семеен проект, а мојот брат е водач на проектот“, додаде тој.
