Дваесет и пет десничарски екстремисти од таканареченото „Граѓанско движење на Рајхот“ се уапсени во Германија, изјави денеска портпаролот на федералното обвинителство, а пренесе агенцијата ДПА.
„Полицијата спроведува рации во 11 од 16-те сојузни покраини во Германија, како дел од големата операција против екстремистите“, додаде портпаролот.
Членовите на движењето не го прифаќаат легитимитетот на германската држава. Тие често одбиваат да плаќаат даноци и собираат нелегално оружје.
Движењето е составено од помали групи со називи како „Конфедерација на германскиот Рајх“ или „Кралство Германија“.
Германската разузнавачка агенција проценува дека движењето има околу 21.000 приврзаници, пренесува ДПА.
Меѓу осомничените во големата истрага е и војник на германскиот Бундесвер.
„Активен војник во командата на Специјалните сили на Бундесверот (КСК) и неколку резервисти на Бундесверот се осомничени во оваа операција на полицијата“, изјави за ДПА портпаролот на Воената контраразузнавачка служба (МАД).
Куќата на војникот и неговата канцеларија во касарната „Граф Цепелин“, во покраината Баден-Виртемберг, биле претресени како дел од националните рации против движењето, кое, наводно, според пишувањaта во медиумите, се подготвувало да изведе и државен удар.
Германските медиуми јавуваат дека полицијата извела рации на 130 локаци.
.webp){kind=icon}
