Обединетите Арапски Емирати (ОАЕ), кои се дом на богатиот со нафта Абу Даби и сјајниот Дубаи, додаваат нов рекорд на својата листа: најмоќна патна исправа во светот. Тоа е според индексот за вредноста на пасошите, кој го објавува „Артон капитал“ (Arton Capital) и каде што во првите десет доминираат европските земји.
Со пасошот на ОАЕ патниците можат без проблеми да влезат во 180 земји, седум повеќе од европските држави како Германија и Шведска и девет повеќе од Јапонија, чија патна исправа на почетокот од годинава беше рангирана како најдобра во светот на листата што ја објави „Хенли и партнер“ (Henley & Partner). Оваа азиска земја го зазема 24-то место на Артоновиот индекс со лесен пристап до 171 земја.
Македонскиот пасош е на 79-то место, со слободен влез во 128 држави во светот. Србија е на 69-то место, со безвизен пристап до 136 земји. Пасошот на Босна и Херцеговина дозволува слободен пристап до 118 држави и според тоа се најде на 93-то место. Словенија е на 34-то место, со безвизен пристап до 169 држави, а Хрватска со безвизен режим во само една земја помалку е на 38-то место.
Во текот на пандемијата, ОАЕ главно се држеа подалеку од целосен карантин, како што имаше во некои земји низ светот, а наместо тоа се потпираа на строги наредби за носење маски и за вакцинација. Таквиот владин пристап за време на пандемијата привлече посетители од целиот свет што сакаа да побегнат од ограничувањата во својата земја.
„Глобалната мобилност брзо расте, и покрај избувнувањето на судирот во Европа и растечката напнатост околу границата. Иако светот продолжува да чувствува потреси од пандемијата, за изненадување е што патувањето никогаш не било полесно, проследено со постојан раст на силата на пасошите во сите сегменти. Таквиот тренд сметаме дека ќе продолжи и во 2023 година“, рече Артон во изјавата.
Вредноста на пасошот се додава на растечката листа на признанија на ОАЕ, кои вклучуваат највисока зграда во светот, најдобар базен и највисок хотел.
Артон рече дека пасошите од речиси секоја поединечна земја во светот оваа година станале помоќни, а нациите сакаат да ја искористат економската предност што се нуди преку овозможување поголема слобода на движењето. „Сепак, привилегиите во Обединетото Кралство забавија во однос на некои европски држави и тој тренд би можел да продолжи додека Британија се бори со почитување на договорот за визи што го постигна со државите од ЕУ“, предупреди Артон.
„Тоа може да им се припише на последиците од напуштањето на заедничкиот пазар и со него поврзаната слобода на движењето“, смета Артон. Земјата во моментов е на 25-то место, со лесен пристап до 171 земја.
Вануату е единствената земја чиј резултат за вредноста на пасошот падна поради суспензијата на нејзината шема за укинување на визите со ЕУ. Авганистанскиот пасош и натаму е најмалку корисен и се најде на дното, односно на 199-то место.
.webp){kind=icon}
