.webp){kind=icon}
Македонскиот пасош се најде на 43-то место на листата најмоќни пасоши на светот во 2023 година подготвена од лондонската консултантска компанија за имиграции „Хенли енд партнерс“ (Henley & Partners). На листата се рангирани вкупно 199 земји, а главен параметар е во колку дестинации може безвизно да се патува со одреден пасош.
Со македонскиот пасош може да се патува без виза во 125 земји, додека 101 држава бараат виза за македонските патници. Според индексот за пасоши на ХП, нашата земја има подобрување за две места во однос на 2022 година, кога го зазеде 45-то место на оваа листа.
Од земјите од регионот Адрија, Словенија е рангирана на високото 9-то место. Со словенечкиот пасош може да се патува без виза дури во 183 земји. Хрватска е на 14-то место, а со хрватскиот пасош безвизно може да се патува во 175 земји. Србија е на 34-то место (без виза во 137 земји), а Босна и Херцеговина е на 47-то место (118 дестинации без виза).
Инаку, Сингапур годинава ја замени Јапонија и се најде на првото место на листата овозможувајќи им на своите граѓани безвизен влез во 192 глобални дестинации. По пет години на врвот, Јапонија падна на третото место бидејќи се намали бројот на дестинации до кои може да се пристапи со нејзиниот пасош без виза. САД, кои беа на врвот на рангирањето пред речиси една деценија, паднаа за две места, на осмото место. Велика Британија, по падот предизвикан од брегзит, скокна за две места, на четвртото, позиција што последен пат ја имаше во 2017 година.
Сингапур е магнет за богатство, каде што од неодамна има прилив на државјани поттикнат од репресијата на приватните претпријатија во Кина и стравувањата од геополитичките тензии. Но не е лесно да се добие привилегија да се користи патниот документ на градот-држава. Нацијата од 5,6 милиони им додели државјанство на околу 23.100 луѓе минатата година, а властите претходно оваа година ја отфрлија можноста да го сторат тоа врз основа на нето-вредноста на поединците.
Рангирањето на „Хенли“ ги следи податоците од Меѓународната асоцијација за воздушен транспорт. Методологијата се разликува од другите индекси за пасоши, како оној што е објавен од финансискиот советник Артон Капитал, кој ги стави Обединетите Арапски Емирати на пол-позиција минатата година.
Со помош на Лов де Веи/Блумберг
