Уставниот суд во Хрватска донел пресуда дека банките не смеат да склучуваат договори и да наплатуваат т.н. излезни такси за предвремена отплата на кредитите и дека таквите провизии мора да им се вратат на потрошувачите, се наведува во соопштението на здружението „Франак“.
Од здружението наведуваат дека Уставниот суд на 13 јули одлучил по пет уставни тужби што Привредна банка Загреб (Privredna banka Zagreb ) и „Адико банка“ (Addiko) ги испратиле до Уставниот суд во врска со преиспитување на одлуките на Врховниот суд на Република Хрватска.
Уставниот суд со заедничка пресуда отфрли вкупно пет такви уставни тужби, каде што не е важно дали банките договориле точен процент од преостанатата главнина или договориле надоместокот да се наплатува според тарифата на банката.
„Секако, тоа важи и за договорите со лизинг-компаниите“, посочуваат од здружението „Франак“. Тие проценуваат дека банките „им должат на потрошувачите неколку десетици милиони евра незаконски наплатени излезни такси, кои се движат од неколку стотици до неколку илјади евра по кредит“. Здружението „Франак“ затоа ги повикува потрошувачите „да ги тужат банките и лизинг-компаниите за наплатените излезни такси и на тој начин да си ги вратат парите со затезна камата“.
.webp){kind=icon}