text size
Американците уште во септември, одговарајќи на анкета, се изјасниле дека на црн петок ќе потрошат во просек по околу 500 долари. Колку се троши кај нас, колку се рентабилни шопинг-центрите во регионот Адрија и како стојат македонските центри во однос на другите – се некои од прашањата на кои ќе одговорат нашите аналитичари во регионалната анализа што ќе ја објавиме в понеделник, во сајбер-понеделник – денот кога попустите се префрлаат на онлајн купувањето.
Во услови на висока инфлација и проблематичен економски раст, пазарот на трудот се покажа како жилав. Но, проблеми во регионот има, особено кога станува збор за младинската невработеност. Европската банка за обнова и развој има проекти за поддршка на младите претприемачи во земјава, а главната цел е да се намали иселувањето. Какви проекти ќе има и кои се очекувањата од нив во интервју за „Блумберг Адрија“ открива Питер Биелик од канцеларијата на ЕБРД во Лондон.
Следната недела ќе пишуваме за предизвиците со кои се соочува земјава во пресрет на исполнувањето на климатските цели. За шест години, рудниците на јаглен во Кичевско и во Битолско треба да бидат затворени. „Блумберг Адрија“ ќе анализира дали е Македонија подготвена за зелена транзиција, колку ќе нè чини тоа и од каде ќе дојдат парите.
Вработувањето на младите е важно и за компаниите чиј главен проблем е недостигот од работна сила, следниот проблем им се финансиите. Зголемувањето на трошоците за задолжување им го ограничува пристапот до свежи пари. Пресметките покажуваат дека каматите за нивните кредити се зголемиле за 75 отсто.
Како на технолошките компании се одразија случувањата околу Сем Алтман од „Опен еј-ај“? Со помош на терминалот на „Блумберг“ ќе подготвиме анализа на движењата во технолошкиот сектор.
Следната недела државната статистика ќе ги објави и најновите податоци за индустриското производство, за цените на производителите во индустријата, за прометот во трговијата, како и за трошоците во градежништвото за третиот квартал од годинава.
.webp){kind=icon}
