.webp){kind=icon}
Бизнисменот и поранешен вицепремиер Кочо Анѓушев попладнево испрати допис до медиумите во кој посочува дека нема основа да биде на црната листа на САД.
Како што нагласува сопственикот и главен извршен директор на групацијата Феро Инвест и БРАКО, по четири години откако самоиницијативно се повлекол од Владата, нема никаков судски процес за било кој сегмент од неговото работење, бидејќи, како што вели, за тоа нема никакви основи.
„Силно ги негирам сите сомневања изразени во документот објавен од почитуваниот Стејт Департмент и сакам да известам дека ќе ја обжалам одлуката и ќе ги искористам сите правни лекови наведени во самиот документ во правец на повлекување на оваа одлука, која ја сметам за непотребна во рамките на заложбите на нашите пријатели, Соединетите Американски Држави, за борба против корупцијата“, истакнува Анѓушев.
Прочитајте повеќе: Кочо Анѓушев ставен на црната листа на САД
Тој исто така посочува дека во периодот додека бил на функција, неговите фирми бележеле само пад и загуби, што, како што вели, е регистрирано и во државните финансиски служби.
„Имам фирми во Велика Британија, Германија, Холандија и во САД и сум американски даночен обврзник, односно јас плаќам данок во Соединетите Американски Држави и сум партнер и соработник со значајни економски субјекти и личности во САД“, посочува Анѓушев.
Од друга страна, американската амбасадорка во земјава, Анџела Агелер, посочи дека денешното назначување на поранешниот вицепремиер за економски прашања и неговото семејство е уште еден доказ дека САД ќе продолжат да ги санкционираат корумпираните актери во оваа земја и во регионот, без разлика на нивната позиција, политичка определба или времето на злоупотребите.
„Ќе следуваат повеќе назначувања, но факт е дека нашите напори и нашите санкции не можат да ја поправат епидемијата на корупција во Северна Македонија. На крајот на краиштата, останува на функционерите и граѓаните на оваа земја да побараат одговорност и промени“, објави Агелер на платформата Х.
