Дарежливоста на рускиот претседател Владимир Путин кон Ким Џонг Ун отиде чекор понатаму кога на севернокорејскиот лидер, кој сака лимузини, му подари нов автомобил.
Путин му подари на Ким автомобил од руско производство за негова лична употреба, објави во вторникот официјалната севернокорејска централна новинска агенција (КЦНА). Тоа беше кажано на митинг на кој присуствуваше Ким Јо Џонг, сестрата на севернокорејскиот лидер, а немаше дополнителни детали за тоа како бил предаден автомобилот. Таа изрази благодарност и рече дека „подарокот служи како јасна демонстрација на посебните лични односи меѓу двајцата врвни лидери“, објави КЦНА.
Портпаролот на Путин, Дмитриј Песков, за РИА Новости изјави дека Ким Џонг Ун добил нов „аурус“. Возилото е резултат на програмата на руската влада за производство на луксузна лимузина како домашна алтернатива на странските модели како „мерцедес“.
Советот за безбедност на Обединетите нации има список на предмети што е забрането да се извезуваат во Северна Кореја за да ја казни за нејзината програма за нуклеарно оружје. Тие вклучуваат јахти, тркачки автомобили и луксузни возила. Министерството за обединување на Јужна Кореја оцени дека подарокот е прекршување на резолуциите на Советот за безбедност на Обединетите нации, пренесува „Јонхап“ (Yonhap News).
Bloomberg
Подарокот доаѓа откако САД и Јужна Кореја го обвинија Ким Џонг Ун дека му доставувал муниција на Путин во вредност од милијарди долари за да му помогне во неговиот напад врз Украина.
Ким покажа дека сака да патува во скапи возила. Неодамна беше виден во теренец „мерцедес бенц мајбах ГЛС 600“ (Mercedes-Benz Maybach GLS 600), кој се продава за основна цена од 174.350 долари.
Тоа е всушност еден од најевтините автомобили на Ким во неговиот возен парк, кој вклучува и блиндиран „мерцедес мајбах“ (Mercedes-Maybach) седан, кој може да се продаде за повеќе од милион долари. Ким има посебен дел во својот луксузен воз за неговите лимузини, вклучувајќи го и оној што беше виден како влегува и излегува од вагонот кога се ракуваше и се насмеа со Путин на самитот во Русија во септември.
Путин е виден како вози во „аурус сенат“ од руско производство. Во прегледот на „Сиднеј морнинг хералд драјв“ (Sydney Morning Herald's Drive), тој беше опишан како копија на „ролс ројс“ тежок 7.200 килограми. Седиштата се од автентична руска кожа, а опциите вклучуваат оклоп отпорен на куршуми, се наведува во рецензијата.
.webp){kind=icon}
