Грција дополнително ги поскапува златните визи

Грчката влада планира да го зголеми минималниот износ што потенцијалните странски купувачи на имот мора да го платат за да обезбедат т.н. златна виза, наведувајќи го како причина притисокот врз пазарот за купување и изнајмување куќи во земјата.

Инвеститорите сега ќе треба да инвестираат минимум 800.000 евра (873.280 долари) во популарни области како што се главниот град Атина, вториот по големина град Солун, Миконос и Санторини и други острови со население од над 3.100 жители, се наведува во соопштението на Министерството за финансии.

Грција веќе еднаш го удвои износот потребен во популарните области за пристап до програмата за златна виза што дава права за престој, зголемувајќи ја сумата на 500.000 евра во август.

Во преостанатиот дел од земјата прагот сега ќе се зголеми на 400.000 евра од 250.000 евра. Во сите случаи инвеститорите можат да купат само еден имот, а неговата површина мора да биде над 120 квадратни метри и не може да се користи за краткорочно изнајмување.

Новите измени на инвестицискиот праг ќе се применуваат од 31 март и имаат цел да ја зголемат понудата на станови за долгорочно изнајмување и да го истакнат влијанието на златната виза врз трошоците за куќите, соопшти Министерството.

Грција примила повеќе од 25.100 апликации и доделила 17.184 дозволи за купувачите што сакаат да живеат во земјата, при што кинеските инвеститори сочинуваат речиси 60 отсто од сите издадени визи, по што следуваат турските инвеститори со 7 отсто.

Цените на недвижностите во Атина вртоглаво пораснаа во текот на изминатите неколку години, делумно благодарение на странскиот интерес, закрепнувањето на економијата на земјата и ниските цени на програмата за златна виза. Тоа, пак, доведе до зголемување на цените за изнајмување.