Автомобил на „Тесла“ со вклучен автопилот предизвикал фатална несреќа

Возачот на автомобил од „Тесла“ (Tesla) што удри и усмрти мотоциклист во областа Сиетл во април годинава користел технологија за асистенција на возачот позната како „целосно самостојно возење“ (full self-driving) во моментот на несреќата, соопштија властите на државата Вашингтон.

„Несреќата е дел од истрагата на криминалниот оддел на Државната патрола на Вашингтон“, изјави во средата портпаролот Крис Лофтис.

И покрај името на технологијата, „Тесла“ и експертите од индустријата велат дека возачите мора да ги држат рацете на воланот и да внимаваат на патот додека го користат софтверот.

Несреќата на 19 април се случи кога 56-годишен возач на „тесла модел с“ (Tesla Model S) од 2022 година удри во мотоцикл на источната државна рута 522, североисточно од Сиетл. Полицијата соопшти дека 28-годишниот мотоциклист загинал на самото место. Возачот на „теслата“ беше уапсен под сомнение за убиство со возило, а на властите им кажал дека бил невнимателен и гледал во својот мобилен телефон додека ја користел технологијата за асистенција на возачот.

Bloomberg

Надлежните утврдиле дека возачот не бил повреден во моментот на несреќата. Тој платил кауција пред првичното рочиште и бил упатен кај обвинителот за одлука по обвинението надвор од притвор, рече Лофтис. 

Од „Тесла“ не одговорија на барањето за коментар.

Инцидентот доаѓа во моменти кога извршниот директор на „Тесла“, Илон Маск, сè повеќе им дава приоритет на инвестициите во автономна технологија. Маск долго време ветува дека автомобилите наскоро ќе можат сами да возат. Минатата недела, за време на разговорите за резултатите од вториот квартал на производителот на автомобили, извршниот директор рече дека компанијата ќе претстави прототипови на роботакси без возач на 10 октомври.

Штотуку беше објавена најновата верзија на софтверот за „целосно самоуправување“, а извршниот директор ги повика сите што се сомневаат во ефикасноста на технологијата сами да ја пробаат.

Неделава Вилијам Стајн, аналитичар во „Труист секјуритис“ (Truist Securities), рече дека за малку избегнал пад додека го тестирал софтверот претходно годинава. Тој призна дека технологијата е „навистина неверојатна, но не е ни блиску до решавање на автономното возење“.

Во Вашингтон не се дозволени самоуправувачки автомобили, освен во претходно одобрени случаи. Во моментов само „Енвидија“ (Nvidia), „Ваимо“ (Vaimo) од „Алфабет“ (Alphabet) и „Зук“ (Zook) на „Амазон“ (Amazon.com) се сертифицирани за тестирање во оваа држава.

Во моментов нема коментари за веста. Биди прв да коментира...

Остави коментар