„Спејс екс“ лансира екипаж за првата приватна прошетка во вселената

„Спејс екс“ (SpaceX) лансира ракета во вселената со четворица приватни астронаути, дел од револуционерна мисија чија цел е да се изврши првата комерцијална вселенска прошетка.

„Фалкон 9“ (Falcon 9) на компанијата предводена од Илон Маск полета од Флорида околу 5:24 часот по локално време на 10 септември, според преносот на настанот во живо на интернет.

Во мисијата, наречена „Поларис дoун“ (Polaris Dawn), е милијардерот Џаред Исакман, кој претходно полета во орбитата со „Спејс екс“ во 2021 година и обезбеди средства за летот и неговиот развој. Со него летаат водечките инженери на „Спејс екс“, Сара Гилис и Ана Менон, како и пријателот на Исакман и поранешен пилот на воздухопловните сили, Скот Кид Потит.

Најважниот момент на мисијата треба да се случи на третиот ден од летот, кога Исакман и Гилис планираат да излезат надвор на платформата од нивниот вселенски брод „Кру драгон“ (Crew Dragon) и да направат мала прошетка. Двајцата ќе излегуваат еден по еден по околу 15-20 минути при што ќе бидат врзани за платформата на леталото.

Целата мисија „Поларис дoун“ треба да трае околу пет дена пред екипажот да се врати на Земјата, слетувајќи во крајбрежните води на Флорида.