Претставници на НАСА рекоа дека ќе им треба уште една недела за да одредат уште колку долго двајца американски астронаути ќе останат на Меѓународната вселенска станица поради проблеми со капсулата на „Боинг“ (Boeing Co.).
Кен Боверсокс, администратор во НАСА, на прес-конференција во средата рече дека агенцијата прави повеќе анализи за безбедноста на повратниот лет и очекува да донесе конечна одлука на крајот на следната недела или почетокот на неделата од 26 август.
„Знам дека сите би сакале прецизен датум“, рече тој. „Разгледуваме некои опции, но треба да ја задржиме флексибилноста“.
НАСА минатата недела соопшти дека работи со „Спејс екс“ (SpaceX) на Илон Маск на плановите за враќање на двајца астронаути на Земјата во февруари 2025 година во случај да не можат да патуваат со проблематичната капсула на „Боинг“.
Астронаутите на НАСА, Бери Буч Вилмор и Сунита Суни Вилијамс живеат на Меѓународната вселенска станица од 6 јуни, кога „Старлајнер“ (Starliner) на „Боинг“ се спои со орбиталната лабораторија.
За време на нивниот лет таму, вселенската капсула се соочи со проблеми, вклучувајќи и повеќекратно истекување на хелиум и откажување на некои мотори што капсулата ги користи за маневрирање низ вселената.
НАСА соопшти дека ќе треба да донесе одлука за враќање до последната недела од август поради количеството на ресурси достапни за „Старлајнер“, како и претстојниот распоред на сообраќај за вселенската станица.
Џо Акаба, главен астронаут во вселенскиот центар Џонсон, рече дека НАСА ги одржува Вилијамс и Вилмор во тек со нивните наоди.
„Ги прашувам за нивното мислење, но кога разговарам со нив, тие се потпираат на нас на Земјата за да ги анализираме податоците и да донесеме одлука“, рече тој на прес-конференцијата. „Тие ќе го направат она што ние ќе го побараме од нив, а тоа е нивна работа како астронаути“.
.webp){kind=icon}
