Владата на вонредна седница ќе расправа за градскиот превоз во Скопје

Владата денеска ќе одржи вонредна седница на која ќе се расправа за проблемот со јавниот превоз во главниот град. Седницата е закажана за 14 часот.

Главниот град денеска остана речиси без градски превоз откако најголем дел автобуси на ЈСП останаа паркирани во базите во Ѓорче Петров и во Автокоманда затоа што претпријатието нема нафта. Од вчера попладне низ Скопје циркулираат само 25 автобуси што користат метан.

ЈСП остана без гориво откако Бирото за јавни набавки (БЈН) ја поништи набавката на нафта. Набавката била оценета како неприфатлива и БЈН дало насоки за нејзино поништување.

Град Скопје обвини дека Бирото креира криза за гориво во ЈСП, со тоа што „за првпат од постоењето на претпријатието ја поништи редовната јавна набавка за гориво во ЈСП како смислено сценарио“.

Освен Владата, денеска вонредна седница ќе одржи и Советот на Град Скопје. Оваа седница е закажана за 18 часот.

Реакции на политичките партии

Од советничката група на СДСМ на прес-конференција излегоа со неколку предлози за надминување на ситуацијата. Тие предлагаат Владата итно да обезбеди 2,5 милиони литри евродизел од државните резерви на нафта, да се свика надзорна расправа во Собранието за состојбата во главниот град, како и да се донесат измени за Законот за финансиска поддршка на општините и јавните претпријатија основани од нив, кои Собранието треба да ги усвои по скратена постапка за да се обезбеди финансиска стабилност на Градот.

Од Либерално-демократската партија, пак, преку соопштение побараа оставка од градоначалничката Арсовска. Колапсот на градскиот превоз во изминатите два дена, како што наведуваат, е последното дно што го допре моменталното градско раководство, „оперирано“ од срам, каква било одговорност и чувство за последици кон сите граѓани што живеат, но и оние што престојуваат или транзитираат низ главниот град.

Во моментов нема коментари за веста. Биди прв да коментира...

Остави коментар