Гордана Силјановска-Давкова, кандидатката за претседател на опозициската ВМРО-ДПМНЕ, води на седмите претседателски избори во Македонија. Според последните податоци објавени на веб-страницата на Државната изборна комисија, на обработени околу 75 отсто од гласачките ливчиња, Силјановска освоила близу 40 отсто од гласовите. По неа е кандидатот на власта, досегашниот претседател Стево Пендаровски, со над 19 отсто освоени гласови.
Ова се седми избори за претседател на Република Македонија, на кои имаше седум кандидати за функцијата. Одзивот на изборите изнесуваше 48,38 отсто до 18.30 часот.
Според Министерството за внатрешни работи, изборниот ден помина во мирна, фер и демократска атмосфера.
Се гласаше на 3.480 избирачки места, а со право на глас во избирачкиот список за претседателските избори се запишани вкупно 1.814.317 гласачи.
Вчера на 31 избирачко место гласаа и нашинци во дијаспората, како и затворениците и болните и немоќни лица.
Овие избори се карактеристични по тоа што првпат од независноста има толку многу кандидати за претседател, изборите се одржуваа во среда, а идентификацијата се вршеше со апарати за отпечаток од прст. Уникатно е и тоа што кампањата и молкот за претседателските избори се преклопија со кампањата за парламентарните избори на 8 мај.
Претседателските избори, според ДИК, ги следеа вкупно 1.601 набљудувач, од кои 915 домашни и 544 меѓународни набљудувачи, како и 84 преведувачи и 58 странски новинари.
Вториот круг за претседателските избори треба да се одржи на 8 мај, заедно со изборите за пратеници во Собранието.
Од независноста на државава на претседателската фотелја седнаа петмина претседатели. Првиот претседател Киро Глигоров и Ѓорге Иванов претседателската функција ја вршеа во два мандата, а по еден мандат имаа Борис Трајковски, Бранко Црвенковски и сегашниот актуелен претседател и кандидат за нов мандат Стево Пендаровски.
.webp){kind=icon}
