„Политико“: Македонската претседателка предизвика контроверзии на инаугурацијата

Бриселскиот портал „Политико“ во осврт за вчерашната инаугурација на новата претседателка Гордана Силјановска-Давкова коментира дека уште на самиот свечен чин во Собранието со неупотребата на уставното име таа предизвикала расправија со соседна Грција и многубројни реакции од Атина.

„Новоизбраната националистичка претседателка на Северна Македонија уште пред да положи заклетва во неделата предизвика дипломатска расправија со соседна Грција“, наведува „Политико“.

Порталот наведува дека за време на церемонијата на полагање заклетва во Парламентот, Силјановска-Давкова, која, како што посочи, е првата жена претседател на младата нација, ја нарекла својата земја „Македонија“, наместо со нејзиното уставно име „Северна Македонија“.

„Амбасадорката на Грција во Скопје, Софија Филипиду, веднаш ја напушти церемонијата на инаугурација во знак на протест, наведува порталот“, додавајќи дека „десничарската партија ВМРО-ДПМНЕ“, чиј кандидат за претседател беше Силјановска-Давкова и која победи и на парламентарните избори минатата недела, го отфрла договорот од 2018 година, кој предвидува земјата да не се нарекува „Македонија“.  

Според историскиот договор од Преспа, наведува изданието, името и Уставот на земјата беа сменети, овозможувајќи ѝ на Северна Македонија да влезе во НАТО во 2020 година и да го започне процесот на пристапување во ЕУ. 

„Политико“ ја пренесува и реакцијата на грчкото МНР, според кое изјавите на новата претседателка ги прекршиле условите од Меѓународниот договор од Преспа меѓу Атина и Скопје од 2018 година и ги загрозиле билатералните односи и изгледите на Северна Македонија за пристапување во Европската Унија, како и пораката на претседателката на Европската комисија, Урсула фон дер Лајен, на X дека „за Северна Македонија да го продолжи својот успешен пат кон пристапувањето во ЕУ, најважно е земјата да продолжи на патот на реформите и целосно почитување на нејзините обврзувачки договори, вклучувајќи го и Договорот од Преспа“. 

Порталот потсетува дека Грција со децении го блокираше пристапувањето на земјава во ЕУ и во НАТО, тврдејќи дека со тоа што се нарекува себеси „Македонија“ го „присвојува грчкото име, како и историјата на античкото грчко Кралство Македонија“. Во текстот се додава и дека во изминатите две години Бугарија исто така ја блокираше кандидатурата на земјата за ЕУ, барајќи уште еднаш да се измени нејзиниот Устав „за да се признае бугарското малцинство“. 

Според порталот, враќањето на ВМРО-ДПМНЕ на власт по седум години, откако извојува „големи победи на парламентарните и претседателските избори минатата недела“, се очекува дополнително да ги компликува односите и со Грција и со Бугарија, како и пристапот на земјата во ЕУ.  

Порталот пренесува и реакција на грчката левичарска опозициска партија Сириза, која „ја осуди употребата на терминот 'Македонија' од страна на Силјановска-Давкова“ и ја повика Владата на Грција „да се откаже од овој пасивен став“ и да ги мобилизира „сите расположливи дипломатски средства на меѓународно и европско ниво“, со цел „со строгост“ да се побара де не се употребуваат термини или преземаат дејства „од страна на новата претседателка и членовите на новата влада на Северна Македонија со кои се прекршува Договорот од Преспа“.