Петдневна жалост во Иран, во рок од 50 дена ќе се избира нов претседател

Врховниот лидер на Иран, ајатолахот Али Хамнеи денеска прогласи петдневна национална жалост поради смртта на иранскиот претседател Ебрахим Раиси, кој загина во хеликоптерска несреќа.

Хамнеи претходно изјави дека првиот потпретседател на Иран, Мохамед Мохбер, е одговорен за извршната власт и оти има рок од 50 дена за одржување претседателски избори.

Дури и пред да биде официјално потврдена смртта на Раиси, ајатолахот во објава на X посочи дека „иранскиот народ не треба да се грижи, нема да има нарушување во работите на земјата“.

Според Уставот, во случај на смрт на иранскиот претседател, првиот потпретседател ја презема функцијата шеф на државата во текот на 50-дневен преоден период до одржување избори, што е предмет на одобрение од иранскиот врховен лидер, кој го има последниот збор во сите државни прашања.

Хеликоптерот во кој загина Раиси беше американски „бел 212“ (Bell), кој го развила компанијата „Бел хеликоптер“ (Bell Helicopter) за канадската армија во доцните 1960-ти како надградба на оригиналниот УХ-1 (UH-1 Iroquois).

Цивилната верзија на тие хеликоптери од ерата на Виетнамската војна беше во широка употреба низ целиот свет и ја користат и влади и приватни оператори. Хеликоптерот беше претставен во 1971 година и набрзо потоа почна да се користи во САД и во Канада, според американски документи за воена обука.

Хеликоптерот „бел 212“ е приспособлив на сите типови ситуации, вклучувајќи и превоз до 15 луѓе, распоредување  воздушна противпожарна опрема, транспорт на товар и монтирање оружје.