Илон Маск вети дека ќе дава 45 милиони долари месечно во политичка група која го поддржува Доналд Трамп, потег што ќе додаде многу пари во напорите за реизбор на републиканскиот кандидат до ноемвриските избори.
Планираната инфузија на готовина на Маск би можела да помогне во изградбата на водството на Трамп во собирањето средства пред претседателот Џо Бајден, кој претрпе бунт од донаторите во последниве недели, при што некои го повикуваат да ја повлече кандидатурата. Бизнисменот милијардер го поддржа Трамп во објава на Х, откако поранешниот претседател беше ранет додека се обраќаше на митинг во Батлер, Пенсилванија, во саботата вечерта.
„Волстрит џурнал“ прв ги објави плановите на Маск да дава околу 45 милиони долари месечно на групата што го поддржува Трамп, цитирајќи луѓе запознаени со ова прашање.
Џо Лонсдејл од „Палантир“ и крипто милијардерите Камерон Винклвос и Тајлер Винклевос се меѓу другите големи донатори на групата, „Америка ПАЦ“ (America PAC – political action committee), која работи на допирање до гласачите за да ги убеди да излезат на гласање во ноември.
Овој комитет собра 8,8 милиони долари во вториот квартал, потроши 7,8 милиони долари и го започна јули со нешто помалку од 1 милион долари во готовина, покажуваат последните податоци на Федералната изборна комисија.
Маск – кој не донираше до јули, според лице запознаено со ова прашање – не беше наведен во извештајот, кој вклучува донации направени помеѓу создавањето на комитетот на 22 мај и крајот на јуни.
Лонсдејл даде 1 милион долари преку неговата компанија. Близнаците Винклвос дадоа по 250.000 долари. Меѓу донаторите е и Џо Крафт, извршен директор на „Алајанс Ресорс партнерс“, кој даде 1 милион долари. Неговата сопруга Кели Крафт беше амбасадор на САД во Обединетите нации за време на Трамп.
Донациите го покажуваат растечкиот момент што Трамп го има меѓу големите донатори во технолошкиот и финансискиот свет, што започна откако тој беше осуден од големата порота на Менхетен на 30 мај по обвиненија за кривично дело поврзани со исплати на ѕвезди од филмови за возрасни. Инвеститорот на ризичен капитал Дејвид Сакс организираше настан за собирање средства за Трамп на 6-ти јуни, при што беа собрани 12 милиони долари.
Кен Грифин од „Цитадел“ и Пол Сингер, основач на „Елиот Инвестмент Менаџмент“, кои беа критичари на Трамп, се сретнаа со поранешниот претседател за да разговараат за донирање за неговата кандидатура за Белата куќа. Никој не ветил дека ќе донира.
Катастрофалниот настап на Бајден во неговата дебата со Трамп на 27 јуни, што ја втурна Демократската партија во војна меѓу неговите приврзаници и оние кои претпочитаат друг знаменосец, ја забрза промената кон Трамп.
Комитетот им дава на републиканците голема готовинска предност во она што се чини дека се најскапите претседателски избори во историјата на САД.
Меѓу надворешните организации кои го поддржуваат Трамп, „Америка ПАЦ“ троши најмногу за директен контакт со гласачите. Досега потрошила 15,8 милиони долари, од кои 13,1 милиони за операции на терен, покажуваат федералните податоци. Плаќале и за дигитални медиуми, пораки и телефонски повици за да се стигне до гласачите.
Групата се фокусира на убедување од врата до врата за излегување на гласање. Неодамнешната одлука на федералната изборна комисија им дозволува на „Америка ПАЦ“ да се координираат со кампањите за информирање на гласачите.
.webp){kind=icon}
