Маск домаќин на Трамп во видеоинтервју на платформата Х

Републиканскиот кандидат за претседателските избори во Соединетите Американски Држави, Доналд Трамп, разговараше со милијардерот Илон Маск на платформата X, а интервјуто, како што беше забележано на почетокот, го следеле повеќе од 1,3 милион луѓе.

Интервјуто на X доцнело повеќе од 40 минути, а според мислењето на Маск имало „масивни сајбер-напади“, но причината за крахот не била сосема јасна.

Трамп го започна разговорот раскажувајќи за неуспешниот обид за атентат врз него на 13 јули на митингот во Батлер, Пенсилванија, кој рече дека повторно ќе го посети во октомври. Тој потоа зборуваше за своите антиимиграциски ставови, предупредувајќи на „нечесни“ луѓе што се обидуваат да влезат во земјата преку границата меѓу САД и Мексико. За Камала Харис, тој рече дека таа ја „уништила“ Калифорнија кога служела како државна обвинителка таму, а подоцна и како нејзина сенаторка. Во врска со војната во Украина, Трамп нагласи дека можел да ја запре. 

Како што процени „Гардијан“, Маск сугерирал дека може да помогне во идната администрација на Трамп како член на „владината комисија за ефикасност“.

Кампањата на Харис го осуди интервјуто, нарекувајќи го пример за „екстремизмот и опасната агенда на 'Проект 2025'“ на Трамп.

„Целата кампања на Трамп е во служба на луѓето како Илон Маск и тој самиот, односно богатите луѓе што се заљубени во себе и кои ќе ја распродадат средната класа“, изјави портпаролот на кампањата на Харис, Џозеф Костело.