Јужна Кореја ја престигна Британија: ВИ-бумот ја постави меѓу берзанските гиганти

Јужна Кореја ја престигна Велика Британија и стана осмиот најголем берзански пазар во светот, поттикната од силен раст на технолошките компании поврзани со вештачката интелигенција.

Вкупната пазарна капитализација на компаниите листирани во Кореја порасна за повеќе од 45 отсто оваа година, достигнувајќи 4,04 билиони долари, додека британската се зголеми за околу 3 отсто, на 3,99 билиони долари, според податоци на „Блумберг“. Големината на британскиот пазар беше речиси двојно поголема од корејскиот сè до крајот на 2024 година.

Растот на корејските акции го нагласува глобалното насочување кон компании поврзани со вештачката интелигенција, што ги поттикна добивките кај двете најголеми листирани компании во земјата: „Самсунг“ (Samsung Electronics Co.) и „СК Хајникс“ (SK Hynix Inc.). 

Овие два гиганта за мемориски чипови сега сочинуваат повеќе од 40 отсто од вкупната пазарна капитализација на референтниот индекс Kospi, кој има повеќе од 800 компании. Дополнителен поттик доаѓа од политиките на претседателот Ли Џе Мјунг за зајакнување на цените на акциите преку реформи во корпоративното управување и пропазарни мерки.

 

„Брзиот подем на Кореја и Тајван одразува структурно ребалансирање на глобалните берзи, поттикнато од нивната доминација во хардверот за вештачка интелигенција, а не од краткорочни инвестициски стратегии“, изјави Франческо Чан, специјалист за инвестиции во пазари во развој и Азија-Пацифик во „ЏП Морган“ (JPMorgan Asset Management) во Хонгконг. „Како столб на синџирот на снабдување за ВИ - со предност во високотехнолошките фабрики и меморија - овие економии привлекуваат стабилен прилив на капитал.“

Растот на корејските акции личи на оној во Тајван, кој во април исто така ја престигна Велика Британија и стана седмиот најголем берзански пазар во светот. Добивките во Тајван се поттикнати и од најголемиот светски производител на чипови, ТСМЦ (Taiwan Semiconductor Manufacturing Co.), кој сега сочинува околу 45 отсто од референтниот индекс на островот. Вредноста на тајванскиот пазар, која сега изнесува 4,48 билиони долари, се приближува до онаа на Канада.

Британскиот индекс FTSE 100 годинава порасна за околу 4 отсто, што не е многу помалку од глобалниот индекс MSCI All Country World, но значително заостанува зад силниот раст на пазарите што профитираат од бумот на вештачката интелигенција. На британскиот пазар, кој е најголем во Европа, и натаму доминираат традиционални сектори како финансии, основни потрошувачки производи и компании од енергетскиот и рударскиот сектор.

 

Фактори како потенцијалот на вештачката интелигенција, глобалните трошоци за одбрана и реформите во корпоративното управување „поддржуваат многу пострмна траекторија за корејските и тајванските акции отколку за Европа“, изјави Патрик Келенбергер, стратег за акции на пазари во развој во ЛО (Lombard Odier) во Женева. „Европа и натаму се соочува со тешкотии во комерцијализацијата и проширувањето на иновациите. Создавањето услови за појава и раст на иновативни компании е клучно - но бара време.“

Иако вредноста на акциите на азиските технолошки сили значително порасна, нивните економии остануваат многу помали од големите европски. Се проценува дека бруто-домашниот производ на Јужна Кореја оваа година ќе изнесува 1,9 билион долари, а на Тајван 977 милијарди долари - далеку под прогнозите од над 3 билиони долари за Германија, Велика Британија и Франција, според Меѓународниот монетарен фонд.

 

Засега, стратегиите на Волстрит остануваат оптимистични за корејските акции, наведувајќи зголемување на заработките поради побарувачката за вештачка интелигенција и поволните вреднувања. „Голдман Сакс“ (Goldman Sachs Group Inc.) ја зголеми својата цел за индексот Kospi на 8.000 поени, главно поттикната од зголемување од над 200 отсто во проекцијата за раст на заработките за 2026 година.