„Алфабет“ сѐ поблиску до “Енвидија“ во трката за најголема компанија во светот

Во текот на изминатата година „Алфабет“ (Alphabet Inc.) од компанија за вештачка интелигенција за која се размислуваше отпосле се претвори во лидер на пазарот речиси во секој аспект од технологијата. Сега е на работ да го престигне гигантот во областа на ВИ-чипови „Енвидија“ (Nvidia Corp.) како најголема компанија во светот.

„’Алфабет’ има значајно присуство речиси во секој агол од ВИ-екосистемот, а комбинацијата од сè што нуди ја става во одлична позиција да биде најголемиот победник во вештачката интелигенција“, рече Лук О’Нил, главен инвестициски директор во „Куксон Пирс Велт менаџмент“ (CooksonPeirce Wealth Management), која поседува удели и во „Алфабет“ и во „Енвидија“.

Матичната компанија на „Гугл“ го затвори берзанското тргување во петокот со пазарна капитализација од 4,8 билиони долари. „Енвидија“ беше под тоа ниво во вторникот, но тридневниот раст кон крајот на неделата ја подигна на 5,2 билиони долари.

Разликата меѓу двете значително се намали во последните шест месеци, вклучувајќи го и растот на „Алфабет“ од 34 проценти во април, што е нејзин најдобар месец од 2004 година. На 31 октомври „Енвидија“ имаше пазарна капитализација од 4,9 билиони долари, додека онаа на „Алфабет“ беше помала од 3,4 билиони долари. Оттогаш, цената на акциите на „Алфабет“ се зголеми за 43 проценти, додека на „Енвидија“ се зголеми само за 6,3 проценти, заостанувајќи зад индексот S&P 500 и индексот на технолошките акции Nasdaq 100.

Bloomberg

 

Инвеститорите велат дека има смисла „Алфабет“ на крајот да ја преземе титулата најголема компанија во светот бидејќи нејзините пипала продираат во толку многу важни делови од технолошката индустрија и бизнисот со ВИ.

„Енвидија“ можеби е лидер во градењето чипови за вештачка интелигенција, но „Алфабет“ има конкурентски производ што добива на популарност. Исто така, поседува голем број гиганти, вклучувајќи ги „Гугл срч“ (Google Search), „Гугл клауд“ (Google Cloud), „Јутјуб“ (YouTube) и „Вејмо“ (Waymo). Покрај тоа, моделот Џемини (Gemini AI) на „Алфабет“ се смета за еден од најдобрите во индустријата, а компанијата е значаен инвеститор во „Антропик“, кој има уште еден водечки модел, „Клод“ (Claude).

„’Енвидија’ е одлична компанија, но има потенцијал да биде многу поциклична ако трошењето за ВИ забави“, рече О’Нил. „’Алфабет’ е толку диверзифициран што ако еден бизнис заостане, другите можат да го надоместат тоа. Не можете да добиете поширок конкурентски ров од ’Алфабет’, а се чини дека тоа е НАЈГОЛЕМАТА компанија во интернет-ерата.“

„Алфабет“ беше најголемата акција на пазарот на почетокот на 2016 година, кога накратко го надмина „Епл“. Од петокот пазарната капитализација на „Епл“ беше 4,3 билиони долари, по што следуваа „Мајкрософт“ со 3,1 билиони долари и „Амазон“ со 2,9 билиони долари.

Оваа сезона на заработки понуди демонстрација за тоа како „Алфабет“ се појавува како истакнат победник меѓу големите технолошки компании. „Не само што забележа посилен раст од очекуваниот во своите бизниси за пребарување и облак туку и нејзините чипови со ВИ станаа клучна атракција за клиентите. Тие наскоро ќе бидат достапни за клиентите на ’Гугл клауд’ за да ги користат во своите центри за податоци“, рече извршниот директор Сундар Пичаи.

Се очекува „Алфабет“ да генерира околу 3 милијарди долари приходи од инфраструктура поврзана со ТПУ (Tensor Processing Unit) во 2026 година и 25 милијарди долари во 2027 година, напиша аналитичарот на „Ситизенс“ (Citizens), Ендру Бун во белешка до клиентите на 5 мај.

 

„Сè што сакате“

„’Алфабет’ едноставно има сè што сакате и затоа сите се чувствуваат толку удобно да го поседуваат, бидејќи има толку многу начини да се победи во вештачката интелигенција“, рече Дивјаунш Диватија, истражувачки аналитичар во „Џанус Хендерсон инвесторс“ (Janus Henderson Investors). „Помеѓу пребарувањето, чиповите, облакот, Јутјуб и Џемини, заработува пари од толку многу извори. Сè уште ми се допаѓа ’Енвидија’, која останува многу силна компанија, но е само производител на чипови.“

Подемот на „Алфабет“ означува зачудувачки пресврт. Пред помалку од една година инвеститорите ги отфрлаа акциите бидејќи основната дејност на компанијата, пребарувањето, се сметаше за потенцијална жртва на потресите што ги предизвикува ВИ. Тоа почна да се менува кога „Алфабет“ почна да ја вклучува ВИ во „Гугл срч“, а Џемини стана еден од најпопуларните четботови управувани од вештачка интелигенција.

Сега аналитичарите брзо ги зголемуваат своите процени за заработката. Во текот на изминатиот месец консензуалната прогноза за нето-добивката на „Алфабет“ за 2026 година се зголеми за околу 19 проценти, а очекувањата за 2027 година се зголемија за повеќе од 7 проценти, според податоците собрани од „Блумберг“.

Покрај тоа, акциите на „Алфабет“ може да се мачат да ги одржат своите добивки, и покрај ентузијазмот на Волстрит. Просечната целна цена на аналитичарите за следните 12 месеци е околу 422 долари, што е за 5,4 проценти повеќе од затворањето во петокот. Тоа е голема промена за акција што добила 160 проценти во последните 12 месеци.

Bloomberg

 

Секако, постои ризик дека Џемини и другите врвни модели на вештачка интелигенција би можеле да бидат престигнати од конкурентите. Минатогодишните проблеми со акциите на „Алфабет“ покажуваат колку брзо може да се промени расположението во ерата на вештачката интелигенција.

Акциите на „Алфабет“ се тргуваат со 28 пати поголема заработка од проценетата, што тешко дека може да се нарече рекорд од ерата на дот-ком. Но тоа е далеку над десетгодишниот просек на акциите од помалку од 21 и приближно исто како и највисокиот мултипликатор на компанијата во 2008 година.

„Дури и ако веќе не го добиваме за ситна цена, не е неразумно да се мисли дека може да го одржи или дури и да го зголеми овој мултипликатор“, рече О’Нил од „Куксон Пирс“. „Не би се двоумеле да го купиме за нови клиенти.“

За дополнително да ја нагласи поентата, тој го цитираше Ворен Бафет, кој рече дека „многу е подобро да се купи одлична компанија по фер цена отколку фер компанија по одлична цена“. Во имплицитна поддршка, „Беркшир Хатавеј“ на Бафет купи удел во „Алфабет“ минатата година, ретка технолошка инвестиција за реномираниот инвеститор во т.н. вредносни акции.

„Дури и ако веќе не е блескава зделка, ова е фер цена“, рече О’Нил. „Нема сомнение дека е одлична компанија.“