Волстрит очекува приходите од вештачка интелигенција на „Спејс екс“ да бидат 100 пати поголеми до 2030 година

Аналитичарите за истражување низ Волстрит им кажуваат на потенцијалните купувачи во ИПО-то на „Спејс екс“ дека очекуваат одделот за вештачка интелигенција на компанијата да има 100 пати раст на приходите на крајот од деценијата, за да ја оправдаат целната проценка од 1,8 билиони долари.

Аналитичарите за истражување на „Еверкор ИСИ“ (Evercore ISI )очекуваат одделот за вештачка интелигенција на „Спејс екс“ да оствари продажба од 755 милијарди долари до 2031 година, во споредба со 3,2 милијарди долари минатата година, според лице запознаено со прогнозите. Истражувачкиот тим предвидува вкупните приходи за компанијата да надминат билион долари таа година, откако објавија 18,7 милијарди долари во 2025 година, рече лицето, барајќи да не биде идентификувано бидејќи информациите не се јавни.

Фирмите од Волстрит го поминаа четвртокот наутро на состаноци со потенцијални купувачи за да ги претстават условите за котирање на компанијата за ракети, сателити и вештачка интелигенција на Илон Маск, додека таа се стреми кон историско деби. Компанијата со седиште во Старбејс, Тексас, го започна процесот на маркетинг за својата првична јавна понуда од 75 милијарди долари, што треба да биде најголемата на сите времиња, по фиксна цена од 135 долари по акција.

 

Тимовите, исто така, предвидуваат дека капиталните расходи на „Спејс екс“ ќе пораснат на повеќе од 360 милијарди долари во 2030 година, во споредба со повеќе од 20 милијарди долари минатата година, рече лицето. „Еверкор“ предвидува дека расходите ќе се зголемат речиси двојно на 732 милијарди долари во 2031 година, со приближно 666 милијарди долари трошоци поврзани со вештачката интелигенција, повеќе од 50 пати повеќе од она што го потроши минатата година, рекоа тие.

„Голдман Сакс“ (Goldman Sachs) ги наведе таканаречените Величествени седум (Magnificent Seven) – група компании која ги вклучува „Енвидија“ (Nvidia Corp) и „Тесла“ (Tesla Inc) на Маск - како споредливи компании заедно со вселенските компании како „АСТ Спејс Мобајл“ (AST SpaceMobile Inc) и „Рокет Лаб“ (Rocket Lab Corp), како и фирмите за вештачка интелигенција „Кор Вејв“ (CoreWeave Inc) и „Небиус Груп“ (Nebius Group NV) и омилената компанија на пазарот „Палантир Технолоџис“ (Palantir Technologies Inc).

„Фајненшл Тајмс“ (Financial Times) претходно објави некои од проценките на „Голдман Сакс“. Портпаролот на „Спејс екс“ не одговори веднаш на барањето за коментар. Претставниците на „Голдман Сакс“ и „Еверкор“ одбија да коментираат.

Се очекува „Спејс екс“да ја објави цената на својата првична јавна понуда (IPO) на 11 јуни. Акциите ќе се тргуваат на берзата Nasdaq и Nasdaq Texas под симболот SPCX.

Истражувачкиот тим на „Голдман Сакс“ постави амбициозни цели до крајот на деценијата. Аналитичарите предвидуваат дека вкупните приходи ќе достигнат 474 милијарди долари во 2030 година и очекуваат приходите од вештачка интелигенција да се зголемат приближно 100 пати на речиси 322 милијарди долари таа година, според некои од луѓето. „Еверкор“ ја проценува вкупната бројка на приходи во 2030 година на 486 милијарди долари, а приходите од вештачка интелигенција на 331 милијарда долари, рече едно лице.

Тимот на „Голдман Сакс“ очекува позитивен слободен паричен тек за 2031 година од повеќе од 72 милијарди долари, по минус од 105 милијарди долари во 2029 година, рече лицето.

Во „Еверкор ИСИ“, истражувачкиот тим предвиде дека вештачката интелигенција ќе се зголеми од помалку од една петтина од приходите на компанијата на 74 проценти до 2031 година, при што приходите од вселенскиот бизнис ќе паднат на еден процент од вкупниот број, во споредба со повеќе од 20 проценти минатата година, рече еден од изворите.

Двете компании очекуваат единицата за поврзување на „Спејс Екс“ - претежно составена од нејзината сателитска интернет услуга - да ја зголеми продажбата на повеќе од 140 милијарди долари во 2030 година од околу 11,4 милијарди долари минатата година, рекоа изворите. Во меѓувреме, се очекува ракетниот оддел да донесе околу 8 милијарди долари во 2030 година, што е приближно двојно зголемување од минатогодишните 4,1 милијарди долари продажба, рече еден од изворите.