Кинески хеџ-фондови: ВИ „супер меурот“ е пред пукање

Два од најпознатите  хеџ-фондови во Кина предупредуваат дека бумот на вештачката интелигенција (ВИ) на глобалните берзи станал неодржлив меур.

„Вилспринг Асет“ (Wealspring Asset), чиј основач Јанг Донг вели дека глобалните ВИ акции станале „супер меур“ и дека „точката на колапс можеби не е далеку“, според писмото до инвеститорите што го виде „Блумберг њуз“. Донг се прослави уште во 2007 година, кога во отворено писмо до инвеститорската јавност повикуваше за повлекување од пазарите со акции затоа што ќе следи глобална финансиска криза. Од Шангајскиот „Банксија центар за инвестициски менаџмент“ (Banxia Investment Management Center) изјавија  дека „тригерот за пукање на ВИ меурот веќе се појавил“, наведувајќи го притисокот врз вртоглавиот раст на приходите во „Антропик“ (Anthropic PBC).

Најмалку четири други кинески хеџ - фондови изразија претпазливост околу вештачката интелигенција во мај, според месечниот пресек на ставовите на фондовите составен од „ЦСЦ Фајненшл Ко.“ (CSC Financial Co.) и виден од „Блумберг њуз“. Четири фондови во резимето беа позитивни, додека преостанатите седум не дадоа став за вештачката интелигенција.

Писмата до инвеститорите нудат увид во тоа како истакнатите хеџ - фондови на Кина гледаат на технологијата што ги тресе пазарите низ целиот свет. Акциите поврзани со ВИ доживеаја бум оваа година, а водечките компании како „СК Хајникс“ (SK Hynix Inc.) и „Мајкрон“ (Micron Technology Inc.) ја зголемија својата вредност за повеќе од трипати. Но, растот страда од ненадејни падови бидејќи инвеститорите стануваат повнимателни.

„Вилспринг“, кој управува со средства во вредност од над 1,4 милијарди долари, напиша дека на многу од кинеските компании за инфраструктура на ВИ  водат „сосема обични“ бизнис модели и бараат постојано трошење капитал за да го одржат својот раст.

„Навистина не антиципиравме  дека само бум поттикнат од бран на масовна побарувачка може да се пренагласи за толку високи проценки и пазарни капитализации“, им рече фондот на инвеститорите. „На биковскиот пазар во 2015 година, постоеше термин ‘безмозочно купување’ - и токму сега, веројатно сме повторно во слична состојба.“

„Вилспринг“ напиша дека некои од најжешките акции на домашниот берзански пазар во Кина „многу веројатно“ ќе паднат за повеќе од 80 отсто, иако не посочи специфични акции кои се ранливи на бран на притисок за продажба.

„Банксија“, која управува со повеќе од 294 милиони долари, посочи на предупредувачки знаци надвор од границите на Кина. Фирмата предвиде дека годишната стапка на приходи на „Антропик“, внимателно следена метрика за стартапите предводници во вештачката интелигенција, нема да ги исполни пазарните очекувања. Големите технолошки компании ќе се повлечат од растечката цена на токените, додека конкурентите на „Антропик“ може да ја намалат нејзината популарност меѓу компјутерските програмери, изјави кинескиот фонд во своето писмо до инвеститорите.

Секако, постои цена ако ја  избегнувате вештачката интелигенција. Фондот „Жијуан“ (Zhiyuan) на „Вилспринг“ и макро-фондот со ниска волатилност на „Банксија“ објавија мали загуби во првите неколку месеци од оваа година, иако остануваат добро профитабилни на подолг период.

Кинескиот индекс на вештачка интелигенција CSI порасна за повеќе од 35 отсто оваа година, надминувајќи го растот од околу 5 отсто на главниот репер. Тоа е сè уште далеку зад движењата на други места: јужнокорејскиот Kospi скокна речиси 100 отсто, поттикнат од силниот раст на „СК Хајникс“ и „Самсунг Електроникс“ .

Основачот на „Банксија“, ​​Ли Беи, останува решителен и им го понуди следниов совет на берзанските играчи: „Ако инвеститорите сакаат да ги фрлат овие пари во бркање вештачка интелигенција - дури и ако ми се налутите што го кажувам ова - сè уште силно би советувал: ве молам, бидете многу, многу претпазливи“.