Пад на акциите на „Софтбанк“ по алармот за безбедноста на вештачката интелигенција

Акциите на „Софтбанк“ (SoftBank Group Corp) забележаа најголем пад во речиси три месеци, откако челниците на „Антропик“ (Anthropic PBC) и  „Опен еј-ај“ (OpenAI) ги повикаа програмерите да го забават темпото на развој на вештачката интелигенција од безбедносни причини.

Ова предупредување ја зголеми нервозата на пазарот во врска со јапонскиот технолошки инвеститор, кој се задолжува дополнително за да ги финансира своите вложувања во различни сегменти од областа на вештачката интелигенција. „Софтбанк“ е еден од најголемите поддржувачи на „Опен еј-ај“, а се очекува нејзината вкупна инвестиција во компанијата што го создаде Чет ГПТ да достигне близу 65 милијарди долари до октомври.

Акциите на „Софтбанк“ паднаа за повеќе од 13 проценти во понеделникот на берзата во Токио, што е нивниот најголем интрадневен пад од крајот на јуни. Тоа е во време кога своповите за кредитен дефолт (credit default swaps) на компанијата се проширија на највисоко ниво од 30 март, приближувајќи се до тригодишни максимуми.

Инвеститорите и на кредитните и на берзанските пазари се загрижени за непоколебливата вера на основачот на „Софтбанк“, Масајоши Сон, во потенцијалот на вештачката интелигенција. Тој иницираше низа проекти за вештачка интелигенција вредни повеќе милијарди долари со неизвесни временски рамки за исплатата на приходите, отфрлајќи ги разговорите за можен балон како „незнаечки“ и изложувајќи ја својата компанија на екстремна нестабилност.

Таа вера е ставена на тест откако „Антропик“ и „Опен еј-ај“ ветија дека ќе го ограничат развојот на најсовремени модели за вештачка интелигенција по серија вознемирувачки безбедносни пробиви. Соосновачот на „Опен еј-ај“, Сем Алтман, исто така потврди дека стартапот нема да се котира на берзата во 2026 година.

Минатата недела „Софтбанк“ обезбеди заем од 11,87 милијарди долари за да ја зајакне својата инвестиција во „Опен еј-ај“, објави „Блумберг њјуз“. Ова се надоврзува на издавањето обврзници за поединечни инвеститори во вредност од билион јени (6,5 милијарди долари), заем од 10 милијарди долари поврзан со акциите на „Опен еј-ај“ и потенцијална продажба на обврзници во вредност до 20 милијарди долари, додека компанијата финансира зделки како што се преземањата на „АББ Роботикс“ (ABB Robotics) и „Диџитал Бриџ“ (DigitalBridge). „Софтбанк“, исто така, најави планови за изградба на центри за податоци ширум светот.

 

Повикот за забавување на развојот на најнапредните модели на вештачка интелигенција (т.н. „frontier models“) ги засилува загриженостите во врска со огромните облози на Сон да се позиционира во центарот на растот на оваа технологија. Акциите на „Софтбанк“ бележат пад од околу 30 проценти во однос на врвот достигнат во јуни, откако Блумберг њјуз и други медиуми објавија дека иницијалната јавна понуда на „Опен еј-ај“ би можела да биде одложена. Врз нивната вредност негативно влијаеја и загриженоста поради силната конкуренција и растечкиот долг во секторот за вештачка интелигенција, како и низата хакерски напади и други неовластени активности.

„Постои загриженост дека вредноста на ‚Опен еј-ај‘ можеби не е толку висока како што претходно се очекуваше“, изјави Југо Цубои, главен стратег во „Даивна Секјуритис“. „Пазарот е на штрек бидејќи сè уште не знаеме колку ќе забави темпото на развој на вештачката интелигенција.“

Сомнежите околу инвестициските перспективи на вештачката интелигенција продолжуваат и покрај уверувањето на шефот на „Антропик“, Дарио Амодеи, дека забавувањето на развојот на можностите за вештачка интелигенција нема да значи забавување на трошењето или растот. Во јунското тримесечје, „Софтбанк“објави профит, потпомогнат од големите зголемувања од нејзините удели во „Интел“(Intel Corp) и развивачот на „Тикток“, „Бајтденс“ (ByteDance Ltd).

„Софтбанк“, исто така, ја забрзува отплатата на некои од своите краткорочни заеми. Компанијата соопшти дека до вторник ќе го отплати преостанатиот износ од 25,9 милијарди долари од долгот од 40 милијарди долари што го доби претходно оваа година за да ја финансира својата инвестиција во „Опен еј-ај“, пред рокот на достасување во март следната година.

— Со помош од Момока Јокојама, Такахико Хјуга, Мин-Џонг Ли и Ендру Монахан