Зделките поттикнати од ВИ донесоа рекордно прибирање капитал во Хонг Конг ова лето

Банкарите во Хонг Конг го прескокнаа летниот одмор, бидејќи налетот за прибирање капитал поттикнат од вештачката интелигенција ги доведе продажбите на акции до рекордно ниво, пркосејќи му на силниот пад на берзата во градот.

Првичните јавни понуди, пласманите и блок-трансакциите прибраа 47,5 милијарди долари во периодот јули-септември, што е најголемиот износ досега за тој период, според податоците собрани од „Блумберг“. Со тоа, прибирањето капитал годинава надмина 92 милијарди долари и се приближи до рекордните 112,5 милијарди долари поставени во 2021 година, иако неодамнешниот раст на приносите на обврзниците и слабите резултати на зделките ги прават инвеститорите и издавачите повнимателни.

Вештачката интелигенција беше во сржта на оживувањето на пазарот на зделки во Хонг Конг, но ова лето донесе ново ниво на интензитет. Кинеските компании прибираа сè поголеми суми и побрзо се враќаа на пазарот, настојувајќи да го финансираат проширувањето во оваа брзорастечка индустрија.

Дополнителната понуда на акции на „Алибаба“ во вредност од 10,2 милијарди долари беше најголемата трансакција во периодот, додека „ Џонгџи“. прибра речиси осум милијарди долари во најголемото берзанско котирање во Хонг Конг во последните речиси седум години. Други компании повеќепати им се обраќаа на инвеститорите: производителот на модели за вештачка интелигенција „Зед еј-ај“ годинава прибра 9,6 милијарди долари преку својата првична јавна понуда, пласмани и конвертибилни обврзници.

„Луѓето прибираат капитал веднаш по истекот на периодот на забрана за продажба на акциите и имаат тенденција да го прават тоа почесто“, изјави Џејмс Ванг, раководител за пазари на акционерски капитал во Азија без Јапонија во „Голдман“. „Претходно, тоа го правеа еднаш, а потоа една до две години беше мирно. Сега го прават тоа и три месеци подоцна повторно се враќаат. Ова ќе продолжи неколку години поради вештачката интелигенција. Не гледам дека тоа темпо ќе забави.“

Освен „Зед еј ај“, конкурентскиот производител на модели „Минимкакс груп“ како и производителите на чипови „Шангај илуватар“ и „Шангак бирен “ исто така се вратија на пазарот во текот на тој интензивен јули, набргу откако истекоа нивните периоди на забрана за продажба на акции по ИПО.

Во блог-објава во неделата, финансискиот секретар на градот Пол Чан го истакна зголеменото учество на инвеститорите од Блискиот Исток, при што неколку фондови од тој регион планираат повеќе да инвестираат во Хонг Конг.

Bloomberg Mercury

Бумот се прошири низ азиско-пацифичкиот регион, каде што продажбите на акции надминаа 120 милијарди долари во третиот квартал, најмногу за тој период во последните шест години. Континентална Кина имаше некои од најголемите зделки во регионот, вклучително и ИПО-то на производителот на мемориски чипови CXMT во вредност од 66,6 милијарди јуани (9,9 милијарди долари), второ најголемо во историјата на земјата.

Индија силно се враќа

Индија, исто така, забележа враќање откако ја започна годината под притисок од војната на Блискиот Исток, падот на акциите и континуираната продажба од странските инвеститори.

Со продажбите на акции од јули наваму беа прибрани рекордни 26 милијарди долари, со што ова стана најдобриот квартал во земјата. Најголемите трансакции вклучуваа владина продажба на удел во осигурителната компанија „Лајс иншуренс груп“ во вредност од 3,2 милијарди долари и долгоочекуваната првична јавна понуда на Националната берза на Индија во вредност од 2,4 милијарди долари, втора најголема во историјата на земјата.

Закрепнувањето се случи и покрај тоа што индексот Nifty 50 падна речиси 9,5 проценти од својот врв на почетокот на август. Големата домашна ликвидност ја поддржа побарувачката за нови понуди.

Листата на претстојни зделки и натаму е богата.„Џио платформс“ на милијардерот Мукеш Амбани одржува средби со инвеститори пред очекуваното берзанско деби во ноември, кое би можело да биде меѓу најголемите ИПО- а во Индија, објави „Блумберг њуз“.

„Очекуваме повеќе ИПО-а до крајот на годината“, изјави Хариш Раман, раководител во „Сити груп’  за извршување, иницирање и решенија на пазарите на акционерски капитал, додавајќи дека интересот на меѓународните инвеститори за ИПО е умерено оптимистички и покрај неодамнешните резултати на зделките.

Претпазливост кон крајот на годината

Бумот во прибирањето капитал се одвива во услови на многу понестабилна пазарна средина. Индексот MSCI Asia-Pacific падна дури седум проценти во јули, бидејќи инвеститорите се прашуваа дали големите инвестиции во вештачката интелигенција можат да создадат доволно високи приноси во иднина, додека технолошкиот индекс Hang Seng Tech во Хонг Конг годинава бележи надолен тренд.

Слабите резултати на зделките сега ја тестираат подготвеноста на инвеститорите. Од 10-те најголеми зделки во Хонг Конг од почетокот на јули, само две се тргуваат над цената на понудата, додека очекувањата за дополнителни зголемувања на каматните стапки од Фед ги заоструваат финансиските услови на глобално ниво.

„Ако го погледнете целокупното расположение, тоа што големи трансакции се тргуваат под понудената цена не е од помош за апетитот за ризик“, изјави Мартин Зол, глобален раководител за пазари на акционерски капитал и глобален ко-раководител за стратешки акционерски капитал и финансирање во „Ејч-ес-би-си холдингс“ (HSBC Holdings Plc.) „Затоа, како што се приближуваме кон крајот на годината, очекувам инвеститорите потенцијално да станат поселективни во однос на тоа каде ќе ги вложуваат своите пари.“

Неколку неодамнешни берзански котирања во Хонг Конг забележаа пад уште на првиот ден од тргувањето, меѓу кои и компанијата за брза мода „Шејн“ и производителот на чипови „Лонгсис“.

Сепак, листата на претстојни зделки останува значителна, вклучително и на пазари кои досега имаа помала улога во годинашниот бум. „Минт“, компанијата што е сопственик на „Џи кеш“, најпопуларната апликација за мобилни плаќања на Филипините, ја утврди цената за ИПО што треба да биде најголемо во историјата на земјата.

Австралија, исто така, ќе добие дел од бумот поврзан со вештачката интелигенција благодарение на претстојното ИПО на операторот на центри за податоци „Фирмус грид“, вредно пет милијарди долари, кое ќе биде едно од најголемите берзански котирања во историјата на земјата.

„Инвеститорите ќе бидат поселективни“, рече Ванг од „Голдман“. „Но, од страната на понудата, и натаму има огромен број зделки што доаѓаат на пазарот. Прашањето е кои од нив ќе ги изберат инвеститорите.“