Во турбулентната година, со нарушувања предизвикани од затегнувањето на монетарната политика од централните банки, стравувањата од рецесија и војната во Украина, рударска акција од Индонезија покажува најдобри перформанси во светот, со раст од неверојатни 1.595 отсто.
Акциите на „Адаро минералс“ (PT Adaro Minerals Indonesia) трпеа поместувања откако се слизнаа од врвот во април, но сè уште одлично се справуваат со конкурентите во рамките на индексот Bloomberg World, кој има 2.803 члена. Во овој индекс „Адаро“ обезбедува двојно повеќе од второпласираната „Туркиш ерлајнс“ (Turkish Airlines).
Компанијата забележа вртоглаво зголемување на цената на акциите од дебито во Џакарта на 3 јануари, кога од 100 рупии се катапултира на 2.990 рупии за нешто повеќе од три месеци пред да дојде до намалување. Во средата цената затвори на 1.695 рупии, со пазарна вредност од околу 4,5 милијарди долари.
Приказ на приноси за Bloomberg World Index / Bloomberg
Иако вредноста на акциите е тесно поврзана со глобалните цени на јагленот, аналитичарите ѝ ги припишуваат добивките на стратегијата на „Адаро“ да го искористи својот неочекуван профит за диверзификација на производството кон алуминиум и батерии за електрични возила.
Компанијата објави скок од 482 отсто во нето-добивката во деветте месеци до септември, додека нејзината просечна продажна цена се зголеми повеќе од двојно, а обемот на продажба на јаглен скокна за 41 отсто. Прогнозите на пет аналитичари со кои се консултира „Блумберг“ сугерираат нагорна линија на цените на акциите од уште 42 отсто во следните 12 месеци.
.webp){kind=icon}