.webp){kind=icon}
Минатата година ќе остане во убаво сеќавање за одредени лица што во наследство или како подарок преку таканаречени нетрговски трансфери на хартии од вредност добија дел од сопственоста од македонски компании, кој во некои случаи е вреден мало богатство.
Според податоците на Централниот депозитар за хартии од вредност (ЦДХВ), во текот на 2022 година по основа на наследство се спроведени 1.280 нетрговски преноси, а по основа на подарок се спроведени 318 преноси на акции. Статистиката покажува раст на подароците во акции во однос на претходните две години и мало намалување кај наследствата во однос на 2021 година.
По барање на „Блумберг Адрија“, од ЦДХВ информираа дека најголемиот број акции пренесени во еден нетрговски трансфер во текот на 2022 година по основа на наследство изнесува 198.224 обични акции, издадени од издавачот акционерско друштво конфекција „Единство“ - Струга.
Најголемата вредност на акции пренесени во еден нетрговски трансфер во текот на минатата година по основа на наследство е преносот на 17.612 обични акции, издадени од издавачот волнарски комбинат „Тодор Циповски-Мерџан“ - Тетекс акционерско друштво – Тетово, со вредност на преносот од 44.030.000 денари, или околу 716.000 евра (вредноста е калкулирана по последната пазарна цена на акцијата).
Од ЦДХВ посочуваат дека најголемиот број на акции пренесени во еден нетрговски трансфер во текот на 2022 година по основа на подарок изнесува 30.976 обични акции, издадени од издавачот „Макстил“ акционерско друштво за производство и трговија со производи на црна металургија – Скопје.
Најголемата вредност на акции пренесени во еден нетрговски трансфер лани по основа на подарок е преносот на 20.000 обични акции, издадени од „Комерцијална банка“АД Скопје, со вредност на преносот од 234.000.000 денари, или околу 3,8 милиони евра (вредноста е калкулирана по последната пазарна цена на акцијата).
На прашањето дали акции можат да им се подарат или да им се остават во наследство на лица што не се во роднински односи, од ЦДХВ информираат дека нема ограничувања кому може да му се подарат акции во согласност со законските прописи.
„Наследството е уредено со Законот за наследување и постојат уредени ситуации кога наследник може да биде и лице што не е во сродство со оставителот (еден пример е тестаментално наследување)“, соопшти ЦДХВ.
