„Најк“ ја суспендираше онлајн продажбата во Турција

„Најк“ ја суспендираше онлајн продажбата во Турција преку својата веб-страница и мобилна апликација, неколку дена откако Турција ги зголеми царинските давачки за онлајн купувањата од странство.

„Не можеме да им гарантираме на нашите потрошувачи дека нивните нарачки ќе пристигнат непречено и навреме, затоа во моментов ги суспендираме онлајн нарачките од Турција“, се вели во соопштението на американскиот гигант објавено на неговата официјална турска веб-страница.

„Продолжуваме да го испитуваме влијанието на неодамнешните промени во турските царински прописи врз искуството за купување на турските потрошувачи“, додаваат од „Најк“.

Иако „Најк“ не прецизираше кои промени го поттикнаа неговиот потег, новата турска регулатива оваа недела ја намали даночната граница за индивидуални онлајн купувања на 30 евра (33 долари) од 150 евра. Се зголеми и даночната стапка на 30 отсто од 20 отсто за стоки купени од Европската унија и на 60 отсто од 30 отсто за стоки купени од други земји.

Компанијата продолжува да ги продава своите производи во Турција во сопствените продавници и во оние на нејзините малопродажни подружници.

Новите царински мерки беа насочени кон намалување на „негативните ефекти“ врз пазарниот удел и вработеноста, вклучително и кај сопствениците на продавници и малите и средните претпријатија, како и загубата на девизи, рече министерот за трговија Омер Болат оваа недела, објави државната агенција „Анадолу“.

Во моментов нема коментари за веста. Биди прв да коментира...

Остави коментар