Проектот за криптовалути што го промовираат Доналд Трамп и неговите синови почнува да се оформува, со фокус на поттикнување на доминацијата на американскиот долар во децентрализираните финансии.
Додека официјалните детали и натаму се штури, проектот познат како „Ворлд либерти фајненшал“ (World Liberty Financial) во објавите на социјалните мрежи имплицираше дека се развива на копија на децентрализираната платформа „Аве“ (Aave). Неговата цел е да поттикне масовно усвојување децентрализирани финансии (или DeFi), што е сегмент на криптопазарот каде што луѓето можат да тргуваат и да позајмуваат дигитални средства користејќи автоматизиран софтвер наместо посредници.
Проектот поддржан од Трамп ќе вклучува т.н. стабилни токени (stablecoins), кои се токени вообичаено дизајнирани да ги следат традиционалните валути како доларот.
„Со ширењето стабилни токени поврзани со САД низ светот, обезбедуваме продолжување на доминацијата на американскиот долар, обезбедувајќи ги американското финансиско лидерство и влијание на глобалната сцена“, посочи „Ворлд либерти фајненшал“ во објавите на платформите за социјално вмрежување X и Телеграм (Telegram).
Проектот е најнов показател дека поранешниот претседател Трамп целосно ја прифати криптоиндустријата, која доби поголема мејнстрим-популарност годинава, и покрај долгата историја на измами и скандали. Синовите на републиканскиот претседателски кандидат, Ерик Трамп и Доналд Трамп Јуниор, го промовираа „Ворлд либерти фајненшал“ на социјалните мрежи во последните неколку недели, а минатата недела нивниот татко го означи проектот во објава на X, која содржеше видео од ветувањето на кандидатот дека ќе ги направи САД „криптопрестолнина на планетата“.
Влезот во децентрализираниот финансиски простор е полн со ризици. Многу DeFi проекти беа хакирани со текот на годините, а некои тимови за издавање токени се вклучија во таканаречените „rug-pulls“, термин што во индустријата се користи во однос на измами во кои основачките тимови креваат фама околу некој проект само за да се ослободат од своите токени кога трговците на мало ќе почнат да купуваат. Според извештајот на безбедносната компанија „Халборн“ (Halborn), вкупните загуби од 50-те најголеми хакирања на DeFi достигнале до 5,5 милијарди долари.
Самиот„Ворлд либерти фајненшал“ започна со лажен старт во вторникот вечер, кога X-профилите на некои членови на семејството Трамп беа компромитирани и искористени за поставување лажни објави за проектот, објави што Ерик Трамп ги нарече „измама“.
Проектот планира да издаде сопствена криптовалута, наречена WLFI, а од неговиот тим циркулираше нацрт во кој е наведена структурата на токените, според извадоци добиени од страницата за вести „Коиндеск“ (CoinDesk). Околу 70 отсто од токените WLFI ќе бидат резервирани за инсајдери, што е невообичаено голем дел во споредба со слични проекти, според извештајот. Остатокот ќе биде достапен преку јавна продажба, иако основачкиот тим ќе добие дел од приходите, објави „Коиндеск“.
Тимот зад проектот вклучува членови на семејството Трамп, како и оние што стојат зад неодамна хакираната апликација наречена „Доу фајненс“ (Dough Finance), според „Коиндеск“. Во нацртот се наведува дека се вклучени сите три сина на Трамп, како и неколку луѓе што го основале „Доу фајненс“, објави „Коиндеск“.
Во последниве недели Трамп се промовираше себеси како „криптопретседател“, ветувајќи дека ќе создаде национална стратегиска резерва на биткоин и ќе назначи регулатори пријателски настроени кон индустријата доколку се врати во Белата куќа. Тој ја издаде четвртата колекција на незаменливи токени (НФТ) и продава нови патики со криптодизајн, кои беа објавени во август.
.webp){kind=icon}
